Turqia dhe UNHCR diskutojnë kthimin vullnetar të sirianëve
“Duke strehuar popullsinë më të madhe të refugjatëve në botë, Turqia mbetet e angazhuar të punojë me UNHCR-në për të gjitha çështjet e refugjatëve, duke përfshirë zgjidhjen e qëndrueshme për sirianët”, thuhet në njoftim
Ankara
Ministria turke e Punëve të Jashtme ka bërë të ditur se Turqia dhe Zyra e Komisionerit të Lartë të Kombeve të Bashkuara për Refugjatët (UNHCR) kanë diskutuar riatdhesimin vullnetar të sirianëve në vendin e tyre, transmeton Anadolu Agency (AA).
“Diskutimet për riatdhesimin vullnetar të sirianëve u zhvilluan sot në Gjenevë midis ekipeve përkatëse të Turqisë dhe UNHCR-së”, njoftoi ministria turke.
Siç thuhet në njoftim, takimi u mbajt me praninë e zv/kryediplomatit turk, Yavuz Selim Kıran dhe ndihmëses së Komisionerit të Lartë për Mbrojtje, Gillian Triggs.
Ministri turk po ashtu njoftoi se diskutimet e ardhshme do të mbahen në Turqi, por pa specifikuar ndonjë datë.
“Duke strehuar popullsinë më të madhe të refugjatëve në botë, Turqia mbetet e angazhuar të punojë me UNHCR-në për të gjitha çështjet e refugjatëve, duke përfshirë zgjidhjen e qëndrueshme për sirianët”, thuhet në njoftim.
Turqia në fillim të tetorit nisi operacionin “Burimi i Paqes” për të eliminuar terroristët e YPG/PKK-së nga Siria veriore në lindje të Eufratit, në mënyrë që të sigurojë kufijtë e Turqisë, të ndihmojë kthimin e sigurt të refugjatëve sirianë dhe të garantojë integritetin territorial të Sirisë.
Ankaraja dëshiron që terroristët e YPG/PKK-së të tërhiqen nga rajoni, në mënyrë që të krijohet një zonë e sigurt për t’i hapur rrugë kthimit të sigurt të rreth dy milionë refugjatëve sirianë.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.