"Spanja do të rihapë ambasadën në Kiev në ditët në vijim"

Kryeministri spanjoll Pedro Sanchez njoftoi se Spanja do të rihapë ambasadën e saj në kryeqytetin ukrainas Kiev në ditët në vijim, transmeton Anadolu Agency (AA).

"Ne po rihapim ambasadën si një shfaqje e përkushtimit të Spanjës ndaj popullit ukrainas", tha Sanchez në një intervistë me transmetuesin spanjoll Antena 3.

Ambasada u evakuua plotësisht më 25 shkurt, një ditë pasi Rusia filloi sulmin në Ukrainë.

Në atë kohë, ministri i Jashtëm Jose Manuel Albares tha se ambasadori i Spanjës në Ukrainë do të kthehej në ambasadë sa më shpejt që të ishte e sigurt.

Duke folur sot, Sanchez tha se ajo që po ndodh në Ukrainë nuk është "një luftë midis Rusisë dhe Ukrainës".

"Është një luftë e zhvilluar nga (Presidenti rus Vladimir) Putin mbi gjithçka që përfaqëson Bashkimi Evropian: demokracinë, lirinë dhe një model prosperiteti i bazuar në drejtësinë sociale", tha ai.

Sanchez pranoi gjithashtu se lufta po i kushton "dukshëm" ekonomisë në Spanjë dhe se vendi së shpejti do të reduktojë parashikimet e tij të rritjes.

"Por nëse nuk do të kishim bërë asgjë dhe nëse do ta kishim lejuar Putinin të merrte Ukrainën, kostoja do të ishte edhe më e lartë", shtoi ai.

Të paktën 1.982 civilë janë vrarë dhe 2.651 janë plagosur në Ukrainë që nga fillimi i luftës më 24 shkurt, sipas vlerësimeve të OKB-së, kurse shifra e vërtetë besohet të jetë shumë më e lartë.

Më shumë se 4,8 milionë ukrainas kanë ikur në vende të tjera, ndërsa 7 milionë të tjerë janë zhvendosur brenda vendit, ka thënë agjencia e OKB-së për refugjatët.