Ministri rus i Punëve të Jashtme, Sergey Lavrov, ka bërë të ditur se Rusia aktualisht është në negociata me udhëheqjen e re siriane për të ruajtur praninë e saj kryesore ushtarake, transmeton Anadolu.

Duke folur në një intervistë për kanalin televiziv Al-Arabia në Moskë, Lavrov argumentoi se sirianët janë “të interesuar” që prania e Rusisë të vazhdojë.

“Sa i përket objekteve tona ushtarake, diskutimet janë në vazhdim. Më lejoni të ritheksoj, sirianët janë të interesuar që prania jonë të vazhdojë. Këto pika, edhe pse nuk kanë më funksion thjesht ushtarak si para dhjetorit të vitit 2025, mbeten të përshtatshme për t’u ripërdorur si qendra humanitare”, tha ai.

Lavrov u shpreh se respekti dhe përfitimi i ndërsjellë janë parimet që kanë mbështetur marrëdhëniet e Rusisë me Sirinë që nga krijimi i shtetit arab.

Ai theksoi se fakti që presidenti sirian, Ahmed al-Sharaa, ka vizituar Rusinë dy herë në më pak se katër muaj dhe se ministri sirian i Punëve të Jashtme, Asaad al Shaibani, ka zhvilluar disa takime me zyrtarë rusë brenda një viti, tregon se të dyja palët i vlerësojnë këto marrëdhënie.

Lavrov argumentoi se prania e Moskës në Siri, veçanërisht në Khmeimim dhe Tartus, shihet si “një kundërpeshë stabilizuese ndaj aktorëve të tjerë”.

Ai theksoi se Izraeli, për shembull, po përpiqet të rrisë ndikimin në jug duke forcuar lidhjet me druzët, të cilët historikisht kanë pasur pakënaqësi ndaj Damaskut.

Kryediplomati rus gjithashtu tha se SHBA-ja duket se ka një plan për t’u tërhequr nga verilindja e Sirisë, duke i bërë thirrje që largimi të menaxhohet “në mënyrë që të mos krijohen kërcënime të reja”.

Ai tha se kampet e DEASH-it në atë zonë janë lënë pas dore, duke shtuar se deri në 10 mijë militantë të ndaluar janë shpërndarë drejt Irakut dhe më gjerë. Ai paralajmëroi se mos adresimi i problemit mund të nxisë paqëndrueshmëri të mëtejshme rajonale.

“Siria shërben si një pikë e përshtatshme tranziti. Ne jemi të gatshëm të kanalizojmë ndihmën tonë humanitare, përfshirë atë për Afrikën, përmes këtyre objekteve. Do të mirëprisnim që edhe shtete të tjera të përdorin këto platforma operative për dërgimin e ndihmave humanitare dhe mallrave civile drejt kontinentit afrikan”, tha Lavrov.

- Konflikti palestinezo-izraelit

Lavrov kritikoi kryeministrin izraelit, Benjamin Netanyahu, për deklaratat kundër krijimit të një shteti palestinez, duke theksuar se një shtet i tillë “do të përmirësonte sigurinë e Izraelit”.

Ai i quajti “absolutisht të papranueshme” pretendimet se në Gaza “nuk ka civilë”, duke vënë në dukje se “sikur të gjithë atje të ishin terroristë, duke filluar nga mosha 3-vjeç”.

"Është bindja jonë e fortë se nuk do të ketë stabilitet apo qetësi atje pa një shtet palestinez", theksoi ai.

Lidhur me nismën e SHBA-së për një Bord Paqeje, Lavrov tha se përfaqësimi palestinez është thelbësor. Ai shprehu gatishmërinë e Rusisë për të kontribuar në rindërtimin e Gazës, përfshirë përdorimin e 1 miliard dollarëve nga fondet e ngrira.

Më tej, Lavrov foli edhe lidhur me Iranin, duke paralajmëruar se sulmet ndaj Iranit do të kishin pasoja negative rajonale dhe rreziqe bërthamore, duke përmendur goditjet e mëparshme ndaj objekteve nën mbikëqyrjen e IAEA-s.

Ai theksoi se Irani ka të drejtë për pasurimin e uraniumit për qëllime paqësore dhe akuzoi Netanyahun për nxitje të masave radikale.

Më tej, Lavrov gjithashtu vlerësoi marrëdhëniet me Arabinë Saudite dhe botën arabe, duke e quajtur Riadin një aktor kyç rajonal.

Për Ukrainën, ai fajësoi qeverinë aktuale për mungesën e zgjidhjes, ndërsa sa i përket marrëdhënieve me SHBA-në i përshkroi si pragmatike, duke përmendur krijimin e një grupi të përbashkët ekonomik.