Dy protestues irakianë vriten në përplasjet me forcat e sigurisë

Dy protestues irakianë humbën jetën gjatë natës në përleshje me forcat e sigurisë në qytetin jugor Nassiriya, tha një burim mjekësor lokal, transmeton Anadolu Agency (AA).

Rastet kanë ndodhur kur forcat e sigurisë kanë hapur zjarr për të shpërndarë demonstruesit pranë një pike kontrolli të sigurisë në qendër të qytetit, thanë dëshmitarët.

Burimi mjekësor, i cili foli në kushte anonimiteti, tha se 35 persona u plagosën gjatë dhunës.

Që nga fillimi i tetorit, Iraku ka qenë skenë protestash masive popullore kundër kushteve të këqija të jetesës dhe korrupsionit. Kërkesat më vonë u shndërruan në thirrje për shpërbërjen e qeverisë së kryeministrit Adel Abdul-Mahdi.

Sipas Komisionit të Lartë të Irakut për të Drejtat e Njeriut, të paktën 340 irakianë kanë humbur jetën dhe rreth 15.000 janë plagosur që prej fillimit të protestave më 1 tetor.