BE: Revolta e grupit Wagner tregon thyerjen e fuqisë së Rusisë

Përfaqësuesi i Lartë i Bashkimit Evropian (BE) për Marrëdhëniet me Jashtë dhe Politikën e Sigurisë, Josep Borrell, tha se rebelimi i grupit Wagner kundër administratës ruse tregoi se lufta në Ukrainë ka thyer fuqinë e Kremlinit dhe ka ndikuar në sistemin e tij politik, transmeton Anadolu.

Borrell bëri një deklaratë për shtyp para takimit të ministrave të jashtëm të BE-së në Luksemburg.

Duke e përshkruar revoltën e grupit Wagner si "përbindëshi i krijuar nga (presidenti rus Vladimir) Putin i cili e kafshon atë", Borrell tha: "Ajo që ndodhi këtë fundjavë tregon se lufta kundër Ukrainës ka thyer fuqinë ruse dhe ka ndikuar në sistemin e saj politik".

Duke theksuar se BE-ja po monitoron nga afër situatën, Borrell deklaroi se trazirat politike të një fuqie bërthamore përbëjnë një rrezik dhe se BE-ja do të punojë për skenarët e mundshëm.

"Tani është koha për të mbështetur Ukrainën më shumë se kurrë", tha Përfaqësuesi i Lartë i BE-së, Borrell.

- Revolta e grupit Wagner

Yevgeny Prigozhin, themeluesi i kompanisë private të sigurisë Wagner, akuzoi ushtrinë ruse për kryerjen e një sulmi ndaj Wagner dhe kërcënoi se do të hakmerrej. Luftëtarët e grupit Wagner u larguan nga Ukraina dhe hynë në rajonin kufitar të Rostovit.

Pas kësaj situate, Shërbimi Federal i Sigurisë (FSB) hapi një çështje penale me akuzën e "trazirave të armatosura".

Presidenti rus, Vladimir Putin, e përshkroi rebelimin e Wagner si "tradhti".

Prigozhin njoftoi se ata do të shkonin në Moskë dhe administrata e Kremlinit kishte rritur masat e sigurisë në shumë pjesë të vendit.

Më pas u njoftua se Yevgeny Prigozhin pranoi propozimin e presidentit bjellorus, Aleksandr Lukashenko, për të ulur tensionet në Rusi më 24 qershor.

Prigozhin njoftoi se ata e kuptonin përgjegjësinë për derdhjen e gjakut rus dhe se do të kthenin kolonat e tyre dhe do të ktheheshin në kampet sipas planit.

Zëdhënësi i Kremlinit, Dmitriy Peskov, deklaroi se çështja penale kundër Prigozhin do të mbyllet dhe se udhëheqësi i rebelimit do të shkojë në Bjellorusi.