ИСТАНБУЛ (АА) - Турскиот Центар за борба против дезинформации денес ги отфрли како лажни тврдењата на социјалните мрежи за напад врз американска воена база во земјата, јавува Анадолу.

Во соопштението, Центарот наведе дека објавите што кружат на одредени профили на социјалните мрежи, во кои се тврди дека „била погодена американска воена база лоцирана во Турција“, не се вистинити.

Од Центарот е истакнато дека во Турција нема воени бази што припаѓаат на која било странска држава, додавајќи дека воздушниот простор, копнената територија, областите под поморска јурисдикција и воените капацитети на земјата се целосно под суверенитет и контрола на Република Турција.

Исто така, беше соопштено дека немало напад врз Турција, а објавите што ја прикажуваат земјата како страна во регионалните конфликти беа опишани како јасен чин на дезинформација.

Според соопштението, одбранбената и безбедносната структура на Турција е целосно функционална, а сите случувања се следат во реално време од страна на релевантните институции.

Центарот ја повика јавноста да не им верува на неоснованите тврдења и да се потпира исклучиво на официјалните соопштенија од властите.