Швајцарското Министерство за надворешни работи денес ја отфрли одлуката на Израел да ги унапреди плановите за изградба на населби во областа Е1 во близина на Источен Ерусалим, предупредувајќи дека овој потег ги поткопува изгледите за мир, пренесува Анадолу.

Во објава на американската платформа за социјални медиуми X, Министерството изјави: „Швајцарија цврсто ја отфрла израелската одлука да одобри планови за изградба на населби во областа Е1 во близина на Источен Ерусалим и ги повикува властите да го повлечат овој проект“.

„Овие планови се спротивни на меѓународното право и ги поткопуваат сите изгледи за трајна безбедност и мир и за Израелците и за Палестинците, врз основа на решението со две држави“, се додава во соопштението.

Министерството нагласи дека „едностраните дејствија и изјави што го загрозуваат мирот и стабилноста мора да престанат“.

Израелскиот министер за финансии, Безалел Смотрич, одобри изградба на 3.401 станбена единица за доселеници во Маале Адумим, источно од Ерусалим, и уште 3.515 во околните области. Проектот има за цел да го подели Западниот Брег на два дела, прекинувајќи ги врските меѓу неговите северни и јужни градови и изолирајќи го Источен Ерусалим.