Светската здравствена организација (СЗО) денес предупреди дека епидемијата на колера во Судан оваа година се влошува, при што речиси 1.100 лица починале од јануари, а здравствениот систем кој и така е кревок, е ставен под уште поголем притисок, јавува Анадолу.

Сите 18 сојузни држави на Судан пријавиле случаи на колера, соопшти портпаролот на СЗО, Кристијан Линдмајер, додавајќи:

„Од јули 2024 година досега се пријавени повеќе од 100.000 случаи и над 2.741 смртен случај.“

Според Линдмајер, од 1 јануари до 11 август 2025 година регистрирани се 48.768 случаи на колера и 1.094 смртни случаи.

Дарфур е меѓу најтешко погодените региони, откако првиот случај беше пријавен во Јужен Дарфур на 29 мај.

„Болеста сега се прошири во 28 општини во сите пет држави на Дарфур“, соопшти портпаролот.

Во регионот досега се пријавени 6.491 случај и 130 смртни случаи, при што 52 % од сите смртни случаи во државите на Дарфур потекнуваат од Јужен Дарфур.

Тој рече дека се преземаат мерки за итно започнување кампања за вакцинација против колера во приоритетните локации во Јужен Дарфур.

Градот Ел Фашер, во Северен Дарфур, се соочува со „тешка хуманитарна и јавно-здравствена криза“ предизвикана од опсадата, раселувањето и недостигот на храна, при што колерата дополнително ги оптоварува ограничените услуги.

„На национално ниво, 38 отсто од здравствените установи не функционираат, а 62 отсто работат само делумно“, нагласи Линдмајер.

Истовремено, стапките на детска вакцинација паднале од над 90 отсто во 2022 година на само 48 отсто во моментов. Оваа година, речиси 20.000 деца биле примени во специјализираните центри за стабилизација поради тешка акутна неисхранетост со компликации.

СЗО потврди 177 напади врз здравствените установи од април 2023 година, што доведоа до 1.176 смртни случаи и 362 повредени. Линдмајер рече дека СЗО продолжува да испорачува залихи и да ги поддржува здравствените центри, но пристапот останува строго ограничен.