Расистички напад на еврејските доселеници на Западниот Брег

РАМАЛА (АА) - Еврејските доселеници оштетија 23 палестински возила во окупираниот Западен Брег и напишаа расистички слогани на ѕидовите на некои куќи, јавува Anadolu Agency (AA).

Според информациите од локалните извори, група еврејски доселеници во ноќните часови извршиле напад во местото Дир Истија во Салфит, во северниот дел на Западниот Брег.

Еврејските доселеници кои го извршиле нападот, на хебрејски јазик напишале расистички слогани на ѕидовите на некои куќи и оштетиле 23 палестински возила.

Израелската полиција, потврдувајќи дека се случил нападот, објави дека ќе започне истрага во врска со настанот.

Радикалната еврејска организација „Наплата на цена“, освен во окупираниот Источен Ерусалим (Кудс) и во Западниот Брег, врши слични напади и во палестинските села и градови во Израел.

На Западниот Брег, окупиран од Израел во 1967 година, има близу 250 нелегални еврејски населби. Повеќе од 400.000 еврејски доселеници во овие области го отежнуваат животот на Палестинците што живеат во окупираниот Западен Брег.

Според меѓународното право, сите еврејски населби во окупираните територии се сметаат за нелегални.