Претседателот на Либан изрази подготвеност за продолжување на преговорите со Израел за прекин на ескалацијата

ИСТАНБУЛ (АА) – Претседателот на Либан, Џозеф Аун, денес нагласи дека израелските напади нема да ги постигнат своите цели и изрази подготвеност за продолжение на преговорите со Израел за прекин на ескалацијата, пренесува Анадолу.

„Ги информирав големите сили и Обединетите нации за целосната подготвеност на Либан да ги продолжи преговорите и да разговара за неопходните безбедносни мерки за запирање на опасната ескалација на Израел“, изјави Аун, за време на средбата со амбасадорите на Данска, Шведска и Норвешка, објави државната новинска агенција ННА.

„Позицијата на Либан останува цврста, како што беше наведено во одлуката на Кабинетот минатата недела, во однос на целосната и конечна посветеност на Либан на одредбите од договорот за прекин на огнот постигнат во ноември 2024 година, кој ги зачувува мирот и стабилноста, во замена за обврската на Израел да ги прекине своите напади на целата либанска територија“, додаде тој.

И покрај договорот за прекин на огнот со Хезболах од ноември 2024 година, Израел ги продолжи своите речиси дневни прекршувања кои оставија стотици жртви и повредени лица.

Во израелските воздушни напади се убиени повеќе од 400 лица, а од понеделниот раселени се илјадници низ територијата на Либан, во екот на прекуграничните напади со Хезболах.

Ескалацијата се разгоре откако Израел и САД ги започнаа заедничките напади врз Иран, во кој загинаа повеќе од 1.200 лица, вклучувајќи го и врховниот лидер, ајатолахот Али Хаменеи. Како одговор на нападите, Техеран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што се стационирани американски воени бази.