Поранешниот туниски претседател Марзуки го осуди пучот по распуштањето на Владата

ТУНИС (АА) - Поранешниот туниски претседател, Монсеф Марзуки, го осуди распуштањето на Владата и суспендирањето на Парламентот од страна на претседателот на земјата, нарекувајќи го пуч, јавува Агенција Анадолија (АА).

Синоќа, тунискиот претседател Кајс Саид ја распушти Владата, ја замрзна работата на Парламентот и ја презеде извршната власт со помош на новиот премиер.

„Саид го прекрши Уставот на кој се заколна и си ги даде себеси сите овластувања“, рече Марзуки во видеопораката објавена на Фејсбук. „Саид се сметаше себеси за шеф на извршната власт и прв судија“, рече тој.

„Ако пучот успее, економските и здравствените услови [на земјата] уште повеќе ќе се влошат“, предупреди Марзуки, нарекувајќи го Саид „најголемиот проблем за Тунис“.

Во својот вчерашен говор Саид рече дека ќе го укине имунитетот на сите членови на Парламентот и дека ќе ја преземе улогата на јавен обвинител. Појасни дека ја донел оваа одлука по консултации со премиерот Хичем Мечичи и со претседателот на Парламентот, Рашед Ганучи.

Во Тунис се одржуваат протести на населението против Владата и против опозицијата, при што пријавени се напади врз седиштата и објектите на партијата Нахда на Ганучи во неколку туниски покраини.

Од јануари, земјата се наоѓа во политички ќор-сокак поради спорот меѓу Саид и Мечичи околу реконструкцијата на Владата што беше одбиена од Саид.

Земјата се соочува и со економска криза и наплив на случаи на коронавирусот во услови на предупредувања за можен колапс на здравствениот систем на земјата.