Израелските сили ранија четворица Палестинци во воена операција во Тулкарем на Западниот Брег

РАМАЛА (АА) - Четворица Палестинци се ранети вечерва од израелските сили за време на тековната воена операција во бегалските кампови во Тулкарем, во северниот дел на Западниот Брег, соопшти палестинската Црвена полумесечина, пренесува Анадолу.

Оттаму потврдија дека нејзини екипи ги пренеле четирите повредени лица во болниците. Меѓу повредените има една жена и еден постар маж, двајцата погодени од боева муниција.

Се наведува дека 67-годишен маж се здобил со повреди на лицето, а една жена била погодена во рамото. Двајца млади мажи биле повредени од истрели, иако не се прецизирани точните локации на нивните повреди.

Од понеделникот вечерта израелската војска спроведува голема операција во подрачјето, фокусирана на градот Тулкарем и бегалските кампови Тулкарем и Нур Шамс.

Според палестинското Министерство за здравство, операцијата резултирала со најмалку осум смртни случаи на Палестинци.

Очевидци известија дека израелските сили продолжиле да ја уриваат и оштетуваат инфраструктурата во камповите Нур Шамс и Тулкарем, патиштата, електричните мрежи и системите за вода.

Во текот на изминатите неколку години израелската војска спроведува редовни рации на Западниот Брег, кои ескалираа со почетокот на војната во Газа на 7 октомври 2023 година. Палестинците, исто така, насилно се напаѓани од илегалните еврејски доселеници.

Според Министерството за здравство, оттогаш се убиени најмалку 833 Палестинци, а над 6.500 се повредени од оган на израелската армија на окупираната територија.