Сириските власти јавија за протести во некои градови поради провокации од елементи на соборениот режим

АЛЕПО/ДАМАСК (АА) - Протестите во Сирија, предизвикани од тврдењата за оштетување на религиозно светилиште, се резултат на провокации на елементи на соборениот режим на Башар ал Асад, соопшти денес привремената администрација на земјата, јавува Анадолу.

Протести избија во неколку области, меѓу кои и Хама, Хомс, Латакија, Тартус и градовите Џабле и Банјас откако на социјалните мрежи се појавија видеа дека е оштетено светилиштето на религиската личност Абу Абдула Хасиби во Алепо.

Судири избиле меѓу демонстрантите и безбедносните сили во централната покраина Хомс и западната покраина Тартус, во кои има загинати и повредени од двете страни, по што властите воведоа мерки за полициски час во Хомс од 18:00 часот до 8:00 часот, јави Сириската новинска агенција (САНА).

Во текот на изминатите три дена безбедносните сили поврзани со привремената администрација ги интензивираа напорите за пребарување во неколку градови, пред сѐ, во покраините Латакија и Тартус, по поранешни режимски функционери обвинети за воени злосторства.

– Соопштение на Министерството за внатрешни работи -

Во соопштението привременото Министерство за внатрешни работи вели дека видеоснимките всушност се „стари снимки од периодот кога Алепо беше ослободен од непознати групи“.

„Нагласуваме дека нашите институции деноноќно работат на заштитата на нашите имоти и верските објекти“, се вели во соопштението на Службата за медиуми на Министерството.

„Целта на повторното циркулирање на овие видеа е да се сее раздор меѓу сирискиот народ во овој чувствителен период“, се додава.

Понатаму се истакнува дека во крајбрежните подрачја на земјата одредени елементи на соборениот режим ја искористиле можноста и организирале вооружени напади против безбедносните сили, со жртви меѓу безбедносниот персонал.

Башар ал Асад, лидер на Сирија речиси 25 години, побегна во Русија откако антирежимските групи ја презедоа контролата над Дамаск на 8 декември, ставајќи крај на режимот на партијата Баас, која беше на власт од 1963 година.

Преземањето на власта се случи откако борците на Хајат Тахрир ал-Шам ги освоија клучните градови во молскавична офанзива што траеше помалку од две недели.