РАМАЛА/ИСТАНБУЛ (АА) – Израел ја продолжи својата воена офанзива во бегалските кампови Тулкарем и Нур Шамс на окупираниот Западен Брег, соопштија вчера палестински официјални претставници, предупредувајќи дека овој потег е дел од поширок план за присилно раселување, јавува Анадолу.

Гувернерот на Тулкарем, Абдула Камил, изјави дека израелската Армија ги информирала жителите дека нејзината операција во двата кампа ќе продолжи до 31 мај.

„Одлуката ја одразува јасната решеност за продолжување на ова злосторство“, рече Камил во изјавата, мислејќи на присилното раселување на жителите, уривањето на домовите и уништувањето на инфраструктурата.

Тој додаде дека продолжувањето дополнително ќе ги влоши хуманитарните услови со кои се соочуваат жителите на двата кампа.

Израелската Армија ја прошири својата офанзива во Тулкарем и Нур Шамс на 27 јануари, шест дена по почетокот на воената операција во бегалскиот камп Џенин.

Одделот за бегалски прашања на Палестинската ослободителна организација (ПЛО) ја осуди одлуката, опишувајќи ја како „нова епизода во тековната агресија“ врз палестинските бегалски кампови.

Одделот соопшти дека продолжувањето доаѓа во рамките на „политиката на присилно раселување и систематско уништување“ што Израел ја спроведува против Палестинците.

Се додава дека целењето на Тулкарем и Нур Шамс е дел од поширок израелски план насочен против палестинските бегалски кампови како живи симболи на Накба (Катастрофата).

Одделот ги повика меѓународната заедница, Обединетите нации, Советот за безбедност и Советот за човекови права итно да дејствуваат за да ја запрат израелската операција и да обезбедат меѓународна заштита за Палестинците.

Од 8 октомври 2023 година, во израелската агресија на Западниот Брег се убиени 1.138 Палестинци, повредени околу 11.700, а приведени се околу 22.000 лица.