Шефот на УНРВА згрозен од израелскиот закон за смртна казна, го повика Врховниот суд да го отфрли

ЖЕНЕВА (АА) – Генералниот комесар на Агенцијата на Обединетите нации за палестински бегалци (УНРВА), Филип Лазарини, денес изјави дека е „апсолутно згрозен“ од новиот израелски закон со кој се воведува смртна казна за палестинските затвореници, јавува Анадолу.

„Апсолутно сум згрозен од овој ужасен закон и навистина се надевам дека Врховниот суд ќе го отфрли“, изјави Лазарини пред новинарите во Женева.

Тој предупреди дека законот е „крајно дискриминаторски“, бидејќи се однесува само на една категорија од населението, нагласувајќи дека глобалниот тренд е кон укинување на смртната казна, а не нејзино повторно воведување.

Израелскиот Парламент, Кнесетот, вчера го усвои законот, со кој смртната казна станува стандардна казна за Палестинците на окупираниот Западен Брег осудени за смртоносни напади врз Израелци.

Според организациите за правата на затворениците и Израелската затворска служба, во израелските затвори во моментов се наоѓаат повеќе од 9.300 Палестинци, меѓу кои 350 деца и 66 жени.

Извештаите укажуваат дека тие се соочуваат со тортура, глад и медицинска запоставеност, што довело до десетици смртни случаи.

Од октомври 2023 година, Израел ги засили мерките против палестинските затвореници како дел од својата воена кампања во Појасот Газа, во која, според локалните власти, убиени се повеќе од 72.000 лица, а над 172.000 се повредени.