"مه‌سرور بارزانی سێ پێوه‌ری بۆ وه‌زیره‌كان دیاریكردووه‌"

هه‌ولێر - AA
كابینه‌كه‌ی نۆیه‌م 19 وه‌زاره‌ت ده‌بێت، 10ی بۆ پارتی، پێنج بۆ یه‌كێتی و چواریش بۆ گۆڕان ده‌بێت.
سه‌رۆكی فراكسیۆنی پارتی دیموكراتی كوردستان ئومێد خۆشناو كه‌ به‌شداری كۆبوونه‌وه‌ی رۆژی دووشه‌ممه‌ی رابردوو له‌نێو شاندی حزبه‌كه‌ی و سه‌رۆكی راسپێردراو بۆ پێكهێنانی كابینه‌ی نۆیه‌می حكوومه‌تی هه‌رێم بوو بۆ سه‌ردانیكردنی لایه‌نه‌كانی پێكهێنه‌ری كابینه‌ی نوێ له‌ لێدوانێكدا بۆ ئاژانسی ئانادۆڵو رایگه‌یاند "پاش ئه‌وه‌ی سه‌رۆكی هه‌رێمی كوردستان سه‌رۆكوه‌زیرانی راسپارد بۆ ئه‌وه‌ی كابینه‌ی حكوومه‌ت پێكبهێنێت كه‌ 30 رۆژی له‌به‌رده‌ستدایه‌ بۆ ئه‌وه‌ی كابینه‌كه‌ پێشكه‌شی په‌رله‌مان بكات، ده‌ست به‌ گفتوگۆكان كرا و سه‌ردانی لایه‌نه‌ سیاسییه‌كان ده‌ستییان پێكرد، سه‌ره‌تا شاندی پارتی دیموكراتی كوردستان كه‌ یاوه‌ری سه‌رۆكوه‌زیرانی راسپێردراو بوو سه‌ردانی مه‌كته‌بی سیاسیی پارتی دیموكراتی كوردستانی كرد و ئه‌و داوایه‌ خرایه‌ روو بۆ ئه‌وه‌ی ئاماده‌كارییه‌كان بكه‌ن و وه‌زیره‌كانییان بخه‌نه‌ روو و سیڤییه‌كانییان پێشكه‌ش بكه‌ن، رۆژی دووشه‌ممه‌ش سه‌ردانی یه‌كێتی نیشتمانی كوردستان و حزبی سوسیالیست دیموكراتی كوردستان و بزووتنه‌وه‌ی گۆڕان كرا، كۆبوونه‌وه‌كان زۆر باش بوون و هه‌موو لایه‌ك پابه‌ندبوونی خۆیان به‌و رێككه‌وتننانه‌ راگه‌یاند كه‌ له‌رابردوودا كراون بۆ ئه‌وه‌ی هه‌م پۆسته‌كانی حكوومه‌ت چۆن دابه‌شبكرێت و هه‌م رێككه‌وتنی سیاسیشن".

له‌درێژه‌ی قسه‌كانیدا خۆشناو گوتی "به‌ لایه‌نه‌كان گوتراوه‌ بۆ ئه‌وه‌ی چی زووه‌ ئاماده‌كاریی بكه‌ن بۆ پێشكه‌شكردنی سیڤیی كاندیده‌كانییان و له‌ ئاینده‌یه‌كی نزیكیشدا له‌گه‌ڵ پێكهاته‌كانی سریان كلدان ئاشووری و توركمان كۆبوونه‌وه‌ ده‌كرێت بۆ ئه‌وه‌ی ئه‌وانیش ئاماده‌كاری بكه‌ن بۆ ئه‌وه‌ی له‌ماوه‌ی یاسایی خۆیدا كه‌ مانگێكه‌ سیڤی كاندیده‌كانییان پێشكه‌ش بكه‌ن، به‌ڵام به‌دڵنیاییه‌وه‌ ئه‌و مانگه‌ ته‌واو نابێت و كاری پێویست ده‌كرێت و كاره‌كان ته‌واو ده‌بێت".

ئومێد خۆشناو له‌درێژه‌ی قسه‌كانیدا بۆ ئاژانسی ئانادۆڵو ره‌تیكرده‌وه‌ هه‌فته‌یه‌ك له‌لایه‌ن مه‌سرور بارزانییه‌وه‌ دانرابێت بۆ لایه‌نه‌كان تا له‌و ماوه‌یه‌دا سیڤیی كاندیده‌كانیان پێشكه‌ش بكه‌ن، له‌مباره‌یه‌وه‌ روونیكرده‌وه‌ "نه‌خێر باس له‌ دیاریكردنی كات نه‌كراوه‌، به‌ڵام سه‌رۆكوه‌زیران باسی له‌ شێوازی هه‌ڵبژاردنی كه‌سه‌كان كرد كه‌ دڵسۆز و پاك بن و له‌چوارچێوه‌ی تایبه‌تمه‌ندی و پسپۆڕییدا بێت، ئه‌گه‌ر به‌پێی پسپۆڕی وه‌زیره‌كان له‌چوارچێوه‌ی كاره‌كانییان هه‌بن باشتره‌".

سه‌رۆكی فراكسیۆنی پارتی دیموكراتی كوردستان ئومێد خۆشناو له‌درێژه‌ی قسه‌كانیدا بۆ ئاژانسی ئانادۆڵو سه‌باره‌ت به‌ ژماره‌ی ئه‌و وه‌زاره‌تانه‌ی كه‌ به‌ركه‌وته‌ی پارتی دیموكراتی كوردستانن رایگه‌یاند "پێشتر له‌چوارچێوه‌ی ئه‌و رێككه‌وتننانه‌ی كراوه‌ راگه‌یه‌ندراوه‌ پارتی چه‌ند وه‌زاره‌ت وه‌رده‌گرێت و هه‌موو ئۆرگانه‌كانی پارتی ئاماده‌كارییان كردووه‌ و له‌ ئاینده‌یه‌كی زۆر نزیكدا ناوه‌كانیش راده‌گه‌یه‌ندرێت".

سه‌باره‌ت به‌پێوه‌ره‌كانی پارتی بۆ دیاریكردنی كاندیده‌كانی گوتی "پارتی پێشتر چه‌ندین كادیر و كاندیدی بۆ پۆسته‌كان هه‌یه‌ و دواجار مه‌كته‌بی سیاسیی پارتی هه‌ڵاوێردی ئه‌و كه‌س و سیڤییانه‌ ده‌كات و پسپۆڕی ره‌چاوده‌كرێت، به‌ڵام ژماره‌یه‌كی زۆر داواكارییان كردووه‌ كه‌ پۆستییان پێ بدرێت، هه‌ندێكیش داواكارییان پێشكه‌ش نه‌كردووه‌، به‌ڵام حزب دیارییان ده‌كات".

حكوومه‌تی هه‌رێمی كوردستان 19 وه‌زاره‌ت له‌خۆ ده‌گرێت ئه‌وانیش وه‌زاره‌ته‌كانی "كشتوكاڵ و سه‌رچاوه‌كانی ئاو، رۆشنبیری و لاوان، په‌روه‌رده‌، كاره‌با، ئه‌وقاف و كاروباری ئاینی، دارایی و ئابووری، ته‌ندروستی، خوێندنی باڵا و توێژینه‌وه‌ی زانستی، ئاوه‌دانكردنه‌وه‌ و نیشته‌جێ كردن، داد، ناوخۆ، كار و كاروباری كۆمه‌ڵایه‌تی، كاروباری شه‌هیدان و ئه‌نفالكراوان، شاره‌وانی و گه‌شتوگوزار، سامانه‌ سروشتییه‌كان، كاروباری پێشمه‌رگه‌، پلاندانان، بازرگانی و پیشه‌سازی، گواستنه‌وه‌ و گه‌یاندن"، هه‌روه‌ها چه‌ند فه‌رمانگه‌ و ده‌سته‌یه‌كیشی هه‌یه‌ كه‌ سه‌رۆكه‌كانییان پله‌ی وه‌زیریان هه‌یه‌ ئه‌وانیش ده‌سته‌كانی "مافی مرۆڤ، چاككردن و پاراستنی ژینگه‌، كاروباری مین، وه‌به‌رهێنان، ناوچه‌ كوردستانییه‌كانی ده‌ره‌وه‌ی ئیداره‌ی هه‌رێم، فه‌رمانگه‌ی په‌یوه‌ندییه‌كانی ده‌ره‌وه‌، فه‌رمانگه‌ی میدیا و زانیاریی، فه‌رمانگه‌ی هه‌ماهه‌نگی و به‌دواداچوون، ئه‌نجوومه‌نی باڵای كاروباری خانمان".

به‌پێی زانیارییه‌كانی به‌رده‌ستی ئانادۆڵو پێناچێت راسپێردراو بۆ پێكهێنانی كابینه‌ی نۆیه‌می حكوومه‌تی هه‌رێمی كوردستان مه‌سرور بارزانی هیچ گۆڕانكارییه‌ك له‌ ژماره‌ی وه‌زاره‌ت و ده‌سته‌كان بكات.

گەریمانەی ئەوە دەکرێت پارتی دیموكراتی كوردستان كه‌ فراكسیۆنی گه‌وره‌ترینه‌ له‌ په‌رله‌مانی كوردستان و 45 كورسیی هه‌یه‌ 10 وه‌زاره‌تی به‌رده‌كه‌وێت كه‌ ئه‌وانیش، ناوخۆ، سامانه‌ سروشتییه‌كان، ته‌ندروستی، په‌روه‌رده‌، شاره‌وانی و گه‌شتوگوزار، كاره‌با، شه‌هیدان و ئه‌نفالكراوان، ئه‌وقاف و كاروباری ئاینی، گواستنه‌وه‌ و گه‌یاندن"، له‌گه‌ڵ فه‌رمانگه‌ی په‌یوه‌ندییه‌كانی ده‌ره‌وه‌. هه‌رچی یه‌كێتی نیشتمانی كوردستانه‌ كه‌ دووه‌م زۆرترین كورسیی په‌رله‌مانی وه‌كو فراكسیۆن هه‌یه‌ و خاوه‌نی 21 كورسییه‌، پێنج وه‌زاره‌تی ده‌بێت ئه‌وانیش "پێشمه‌رگه‌، پلاندانان، كشتوكاڵ و سه‌رچاوه‌كانی ئاو، پلاندانان، رۆشنبیری و لاوان"، له‌ پاڵ چه‌ند ده‌سته‌یه‌ك. بزووتنه‌وه‌ی گۆڕانیش كه‌ سێهه‌م گه‌وره‌ترین كورسیی په‌رله‌مانی له‌نێو فراكسیۆنه‌كاندا هه‌یه‌ و12 كورسیی بردووه‌ته‌وه‌ چوار وه‌زاره‌تی ده‌بێت ئه‌وانیش دارایی و ئابووری، پیشه‌سازی و بازرگانی، كار و كاروباری كۆمه‌ڵایه‌تی، ئاوه‌دانكردنه‌وه‌.
پۆسته‌كانی سه‌رۆكی هه‌رێم و حكوومه‌تی هه‌رێمی كوردستان، جێگری سه‌رۆكی په‌رله‌مان، له‌لای پارتی دیموكراتی كوردستان ده‌بێت. یه‌كێتی نیشتمانی كوردستان سه‌رۆكی په‌رله‌مانی كوردستان، جێگری سه‌رۆكی حكوومه‌تی هه‌رێمی له‌لا ده‌بێت. هه‌رچی بزووتنه‌وه‌ی گۆڕانیشه‌ ئه‌وا پۆسته‌كانی جێگری سه‌رۆكی هه‌رێم و یاریده‌ده‌ری سه‌رۆكی حكوومه‌تی هه‌رێم بۆ كاروباری چاكسازی له‌لا ده‌بێت.