ئومێد خۆشناو: "په‌رله‌مان بۆ یه‌ك دانیشتن كارا ناكرێته‌وه‌"

هه‌ولێر-AA
ئومێد خۆشناو ده‌ڵێت "له‌كاتی ئاماده‌نه‌بوونی گۆڕان و كۆمه‌ڵ بۆ كاراكردنه‌وه‌ی په‌رله‌مان ئه‌وا چه‌ند بژارده‌یه‌ك هه‌یه‌ له‌نێویاندا ئه‌وه‌یه‌ سه‌رۆكایه‌تی له‌ نێوان یه‌كێتی و پارتی و یه‌كگرتوو بێت".

سه‌رۆكی فراكسیۆنی پارتی دیموكراتی كوردستان له‌ په‌رله‌مانی كوردستان، ئومێد خۆشناو له‌باره‌ی كاراكردنه‌وه‌ی په‌رله‌مان و میكانیزمه‌ یاساییه‌كانی ئه‌و كاره‌ له‌ لێدوانێكدا بۆ ئاژانسی ئانادۆڵو رایده‌گه‌یه‌نێت کە یه‌كه‌م دانیشتن به‌ ته‌مه‌نترین په‌رله‌مانتار سه‌رۆكایه‌تی ده‌كات و گوتی: "ئه‌وه‌ی گرنگه‌ ئه‌وه‌یه‌ بڕیاردراوه‌ به‌ڵێ به‌دڵنیاییه‌وه‌ په‌رله‌مان كاراده‌بێته‌وه‌ و كۆبوونه‌وه‌كانی ئه‌نجام ده‌دات، باشترین بژارده‌ش به‌ لای ئێمه‌ ئه‌وه‌یه‌ هه‌موو لایه‌نه‌كان پێكه‌وه‌ به‌و كاته‌ كه‌مه‌ی له‌به‌رده‌مان ماوه‌ بتوانیین بگه‌ینه‌ ئه‌و سیغه‌یه‌ی رێككه‌وتنێك بكه‌ین و جارێكی تر په‌رله‌مانی كوردستان به‌ هه‌مان ده‌سته‌ی پێشوو كارا بكرێته‌وه‌، دواتریش هه‌ر گۆڕانكارییه‌ك بكه‌ین به‌ رێگه‌ ئوسوڵییه‌كه‌ی خۆی بكه‌ین، به‌ڵام ئه‌گه‌ر لایه‌نه‌كانی دیكه‌ به‌تایبه‌ت بزووتنه‌وه‌ی گۆڕان و كۆمه‌ڵی ئیسلامی نه‌یه‌نه‌ پێشه‌وه‌ و به‌شێك نه‌بن له‌ پڕۆسه‌ی كاراكردنه‌وه‌، ئه‌وا رێگه‌یه‌كی یاسایی ئوسوڵی و یاسایی ده‌گیریته‌ به‌ر له‌ رێگه‌ی په‌یڕه‌وی ناوخۆی په‌رله‌مانی كوردستان له‌ مادده‌ی 22دا رێگه‌ی داوه‌ ئه‌ندامانی په‌رله‌مانی كوردستان به‌ڕێژه‌ی یه‌ك له‌سه‌ر چواری ئه‌ندامانی كۆبوونه‌وه‌یه‌ك ده‌كه‌ین و داوا ده‌كه‌ین كه‌ به‌ته‌مه‌نترین ئه‌ندامی په‌رله‌مانی كوردستان سه‌رپه‌رشتی كۆبوونه‌وه‌كه‌ بكات و دیسان له‌ رێگه‌ی په‌یڕه‌وه‌وه‌ سكرتێرێك هه‌ڵبژێردرێت بۆ ئه‌وه‌ی هاوكاری ئه‌و به‌ڕێزه‌ ببێت و كۆبوونه‌وه‌كه‌ به‌ڕێوه‌ببات".

سه‌باره‌ت به‌وه‌ی ئه‌گه‌ر بزووتنه‌وه‌ی گۆڕان و كۆمه‌ڵی ئیسلامی به‌و شێوازه‌ی باسی لێوه‌ده‌كرێت له‌ چۆنیەتی كاراكردنه‌وه‌ی په‌رله‌مان و ئه‌ركه‌كان و دانیشتنه‌كانی نەهاتنە پێشەوە ئومێد خۆشناو گوتی: "ئێمه‌ جارێكی دیكه‌ جه‌خت له‌سه‌ر ئه‌وه‌ ده‌كه‌ین و خوازیاریین بگه‌ینه‌ سیغه‌یه‌ك له‌ رێككه‌وتن بۆ ئه‌وه‌ی هه‌موومان جارێكی دیكه‌ له‌و پڕۆسه‌یه‌ به‌شداری ببین، ئه‌گه‌ر نا به‌ دڵنیاییه‌وه‌ به‌ رێگه‌یه‌كی ئوسوڵی دیموكراسی په‌یڕه‌ویی یاسای په‌رله‌مان كارا ده‌كه‌ینه‌وه‌".

ده‌رباره‌ی ئه‌وه‌ی ئایا سه‌رۆكایه‌تی په‌رله‌مانی كوردستان چۆن دابه‌ش ده‌كرێته‌وه‌ له‌كاتێكدا ئه‌گه‌ر ئه‌و دوو لایه‌نه‌ی سه‌ره‌وه‌ ئاماژه‌یان بۆ كرا نه‌هاتنه‌وه‌ و ئاماده‌ نه‌بوون به‌و شێوازه‌ په‌رله‌مان كارا بكرێته‌وه‌ و تێبینییان هه‌بوو، سه‌رۆكی فراكسیۆنی پارتی دیموكراتی كوردستان له‌ په‌رله‌مانی كوردستان، ئومێد خۆشناو بۆ ئاژانسی ئانادۆڵو روونی ده‌كاته‌وه‌ "بۆ كاراكردنه‌وه‌ی په‌رله‌مان كۆمه‌ڵێك بژارده‌ هه‌ن، به‌ڵام هێشتا رێككه‌وتنی یه‌كلاییكه‌ره‌وه‌ له‌سه‌ر ئه‌و بژاردانه‌ نه‌كراوه‌، ده‌كرێت یه‌كێك له‌و بژاردانه‌ ئه‌وه‌ بێت سه‌رۆكایه‌تی په‌رله‌مان له‌ نێوان یه‌كێتیی نیشتمانیی كوردستان و پارتی دیموكراتی كوردستان و یه‌كگرتووی ئیسلامی كوردستان دابه‌ش بكرێت، یان پێكهاته‌كانی دیكه‌ی ئه‌م وڵاته‌ له‌ سه‌رۆكایه‌تی په‌رله‌مان به‌شدارییان پێ بكرێت".

ده‌رباره‌ی ئه‌وه‌ی كه‌ په‌رله‌مان بۆ ته‌نها یه‌ك دانیشتن كارا ده‌كرێته‌وه‌ وه‌كو ئه‌وه‌ی هه‌ندێك لایه‌ن باسی لێوه‌ده‌كه‌ن كه‌ گوایه‌ ئه‌ویش بۆ شه‌رعییه‌ت دانه‌ به‌ پرسی ریفراندۆم و ئه‌نجامدانی كه‌ بڕیاره‌ له‌ 25ی ئه‌م مانگە به‌ڕێوه‌بچێت، خۆشناو رایگه‌یاند "ئه‌وه‌ی ئه‌نجامده‌درێت كۆبوونه‌وه‌یه‌كه‌ بۆ ته‌فویزی ریفراندۆم كه‌ ته‌خویلی كۆمیسیۆن بكه‌ین بۆ ئه‌نجامدانی راپرسی و پشتگیریكردنه‌ له‌ راپرسی و ئه‌و كارانه‌ی له‌ماوه‌ی رابردوو كراوه‌ كه‌ ئه‌مه‌ یه‌كه‌م كۆبوونه‌وه‌ی په‌رله‌مان ده‌بێت و دواتر كاره‌كان به‌رده‌وام ده‌بن".

خۆشناو بۆ ئاژانسی ئانادۆڵو گوتیشی: "نه‌خێر په‌رله‌مان بۆ یه‌ك دانیشتن كارا ناكرێته‌وه‌، په‌رله‌مان یه‌ك دانیشتن ده‌كات وه‌كو ده‌ستپێك كه‌ پاش ماوه‌یه‌ك له‌ دابڕان دێته‌وه‌ به‌ كارێكی گرنگ و بۆ پرسێكی گرنگ كه‌ 100 ساڵه‌ میلله‌ته‌كه‌مان چاوه‌ڕوانی ده‌كات ئه‌ویش پرۆسه‌ی ریفراندۆمه‌، و دوای ئه‌وه‌ش كۆبوونه‌وه‌كان به‌رده‌وام ده‌بن به‌ رێگه‌ی ئوسوڵی خۆی ده‌كه‌وێته‌ سه‌ر سكه‌ی خۆی".

په‌رله‌مانی كوردستان نزیكه‌ی دوو ساڵ ده‌بێت به‌ هۆی كێشه‌ سیاسییه‌كانی نێوان لایه‌نه‌كانی هه‌رێم به‌ تایبه‌ت پارتی دیموكراتی كوردستان و بزووتنه‌وه‌ی گۆڕان له‌سه‌ر یاسای سه‌رۆكایه‌تی هه‌رێم په‌كخرا و له‌و كاته‌وه‌ په‌رله‌مان نه‌یتوانیوه‌ هیچ كۆبوونه‌وه‌یه‌ك بكات و كێشه‌كان له‌دوای ئه‌و به‌رواره‌ تا ئه‌مڕۆ به‌ هه‌ڵپه‌سێردراوی له‌ نێوان لایه‌نه‌كان ماونه‌ته‌وه‌.
بە پێی رێککەوتنی نێوان یه‌كێتیی نیشتمانیی كوردستان و پارتی دیموكراتی كوردستان بڕیارە رۆژی پێنجشەممە ١٤ی ئەم مانگە پەرلەمان کارا بکرێتەوە.