بارسێلۆنا لە دەرەوەی یاریگای خۆی سێ خاڵی لە ڤیاریال سەند

مەدرید- AA

لە میانی یارییەکانی هەفتەی ١٥ی لا لیگادا، یانەی بارسێلۆنا لە دەرەوەی یاریگای خۆی بە ئەنجامی دوو بە سفر بەسەر ڤیاریالدا، سەرکەوت.

گێمی یەکەمی یارییەکە بە بێ گۆڵ کۆتایی هات. لە گێمی دووەم و لە خولەکی ٦٠دا، دانیەڵ رابای یاریزانی ڤیاریال کارتی سووری وەرگرت و یانەکەی نیو کاتژمێری کۆتایی یارییەکە بە ١٠ یاریزانەوە یاریی کرد.

دوای ئەوەش بارسێلۆنا بە سوود وەرگرتن لە کەمی ژمارەی یاریزانانی یانەی بەرامبەر لە خولەکی ٧٢دا و لە رێگەی گۆڵێکی سوارێزەوە بە گۆڵێک پێشکەوت. دواتر و لە خولەکی ٨٢دا میسی تۆڕی گۆڵی یانەی ڤیاریالی هەژاند و ئەنجامەکەی بۆ یانەکەی کردە دوو بە سفر هەر بەو ئەنجامەش یارییەکە کۆتایی هات.

یاریزانی یانەی بارسێلۆنا، ئەندرێس ئینێستا بە هۆی پێکانەوە بەشداریی لە یارییەکەدا، نەکرد.