ھیلاری کلینتۆن: "دیموکراسییەتی ئەمریکا لە قەیران دایە"

نیویۆرک -AA

بەربژێری دیموکراتەکان بۆ ھەڵبژاردنەکانی سەرۆکایەتی ئەمریکا لە ساڵی ٢٠١٦، ھیلاری کلینتۆن ھۆشداری ئەوەی دا کە دیموکراسییەتی ئەمریکا کەوتووەتە مەترسییەوە.

کلینتۆن وتارێکی لە گۆڤاری The Atlantic لە ژێر ناونیشانی "دیموکراسی ئەمریکا لە قەیران دایە" نووسی و تێدا رەخنەی توندی لە سەرۆکی ئێستای ئەمریکا، دۆناڵد ترەمپ گرت.

کلینتۆن رایگەیاند کە ترەمپ لەو ئاستە ناشرینە زیاتر دابەزیوە کە لە ھەڵمەتەکانی ھەڵبژاردنی ٢٠١٦ پەیڕەوی دەکرد و گوتیشی: "ئیدارەی ترەمپ، بە سیاسەتی جیاکردنەوەی منداڵانی پەناخواز لە خانەوادەکانیان، بووەتە ھۆکاری ئەنجامدانی ستەمێکی بێ وێنە".

گوتیشی :"ترەمپ و ھاوڕێیانی کاری وا ناشرینیان ئەنجامداوە کە ئیتر زۆر قورسە چاودێری گشتیان بکەیت. وابیر دەکەمەوە کە ئەمە تاکتیکی چاوبەستنی ئێمە بێت بەرامبەر ئامانجەکان. بە دڵنیاییەوە ئامانجی ئێمە پاراستنی دیموکراسییە. وەک ھاووڵاتی ئەمە گرنگترین ئەرکی ئێمەیە. لە ئێستادا دیموکراسی ئەمریکا لە قەیران دایە".

کلینتۆن بەرگری لەوەش کرد کە سەرۆکی ئەمریکا لە پێنج بەرەوە ھێرشی کردووەتە سەر دیموکراسیەت. گوتیشی: "ترەمپ بە دەنگۆییەکانی ھەماھەنگیکردن لەگەڵ رووسیا لە ھەڵبژاردنەکان و رێگری لە لێکۆڵینەوەی وەزارەتی داد لە دەستێوەردانەکانی رووسیا و لێدوانە درۆینەکان و تۆمەتبارکردنی میدیا بە درۆزن و پەیڕەوکردنی سیاسەتی جیاکاری و نەتەوەپەرستی، ھێرشی کردووەتە سەر دیموکراسی و یەکێتی وڵات".