Klubet e futbollit spanjoll këtë javë do të fillojnë stërvitjen

Klubet profesioniste të futbollit në Spanjë do të fillojnë trajnimet këtë javë me lejen e qeverisë, transmeton Anadolu Agency (AA).

"Klubet LaLiga Santander dhe LaLiga SmarBank stërviten përsëri këtë javë", tha La Liga në një deklaratë të publikuar në faqen e saj të internetit.

La Liga tha se Ministria spanjolle e Shëndetësisë u dha klubeve leje të kthehen në stërvitje në dy divizionet kryesore.

"Në përputhje me Protokollin e Kthimit në Trajnim që LaLiga ka hartuar me ekspertë mjekësorë, fillon trajnimi vetëm për lojtarët profesionistë nga LaLiga Santander dhe LaLiga SmartBank, pas një ekzaminimi mjekësor nga shërbimet e klubit", tha La Liga.

LaLiga Santander është divizioni kryesor i futbollit në Spanjë dhe LaLiga SmartBank është divizioni i dytë.

Në muajin mars, ndeshjet e La Ligës u ndaluan për një periudhë të pacaktuar, në mes të shpërthimit të pandemisë COVID-19, por qeveria së fundmi njoftoi kufizime të lehtësuara pasi rreziku i virusit po pakësohet.

Spanja të hënën raportoi 164 vdekje të reja nga koronavirusi, duke e çuar në 25.428 numrin e përgjithshëm të viktimave.

Pas shfaqjes për herë të parë dhjetorin e kaluar në Wuhan të Kinës, koronavirusi është përhapur në mbarë botën, ndërsa Organizata Botërore e Shëndetësisë (OBSH) shpërthimin e shpalli pandemi globale.

Sipas të dhënave nga Universiteti John Hopkins me qendër në SHBA, numri i të prekurve nga pandemia ka tejkaluar shifrën 3.55 milionë, me rreth 248 mijë të vdekur dhe mbi 1.13 milion të shëruar.