SHBA, arrestohen protestues pro-palestinezë në New York University

Dhjetëra njerëz u arrestuan në New York University (NYU) në Manhattan, teksa protestat pro-palestineze nëpër kampuse u përshkallëzuan në të gjithë SHBA-në, transmeton Anadolu.

Sipas raporteve të mediave, oficerët e Departamentit të Policisë së New York-ut (NYPD), të pajisur me uniforma për të përballur rebelim, hynë në kampin e NYU-së dhe përdorën zinxhirë për të ndaluar protestuesit që dënuan ofensivën e Izraelit në Rripin e Gazës, ku janë vrarë më shumë se 34 mijë persona.

Arrestimet në NYU erdhën disa orë pasi policia arrestoi 45 persona në Universitetin Yale në New Haven, Connecticut dhe pasi Universiteti Columbia në New York njoftoi se po kalonte në mësim online për shkak të protestave pro-palestineze.

Presidentja e Universitetit Columbia, Minouche Shafik, e cila përballet me thirrje në rritje për të dhënë dorëheqje, tha se "decibeli" i mosmarrëveshjeve është rritur ditët e fundit. "Për të zbutur inatin dhe për të na dhënë të gjithëve një shans për të shqyrtuar hapat e ardhshëm, unë po njoftoj se të gjitha orët do të mbahen virtualisht të hënën", tha Shafik në një deklaratë.

Mbi 100 studentë, përfshirë vajzën e Përfaqësueses amerikane Ilhan Omar, u arrestuan në Universitetin Columbia të enjten teksa po organizonin një protestë pasi Shafik i bëri thirrje NYPD-së për të hequr demonstratën.

Të gjithë përfaqësuesit republikanë nga New Yorku në Dhomën e Përfaqësuesve, 10 në numër, i bënë thirrje presidentes Shafik të tërhiqej nga posti i saj mes protestave të vazhdueshme.

Ligjvënësit thanë në një letër se "anarkia ka përfshirë" kampusin e shkollës në Manhattan dhe akuzuan presidenten për dështimin për t'u siguruar studentëve "një mjedis të sigurt mësimi".