Pakistani renditet si vendi më i ndotur në botë në vitin 2025

Pakistani u rendit si vendi më i ndotur në botë në vitin 2025, i ndjekur nga Bangladeshi dhe Taxhikistani, treguan të dhënat më të fundit për cilësinë e ajrit, transmeton Anadolu.

Vendi i Azisë Jugore kryesoi listën me përqendrime të grimcave të rrezikshme të vogla të njohura si PM2.5 deri në 13 herë më të larta se niveli i rekomanduar nga Organizata Botërore e Shëndetësisë (OBSH), tha kompania zvicerane për monitorimin e cilësisë së ajrit "IQAir" në raportin e saj vjetor.

Sipas raportit, pesë vendet më të ndotura ishin Pakistani (67.3 µg/m³), Bangladeshi (66.1 µg/m³), Taxhikistani (57.3 µg/m³), Çadi (53.6 µg/m³) dhe Republika Demokratike e Kongos (50.2 µg/m³).

- Qytetet më të ndotura

Qyteti Loni në shtetin më të madh të Indisë, Uttar Pradesh, ishte qyteti më i ndotur, duke regjistruar një mesatare vjetore të përqendrimit të PM2.5 prej 112.5 µg/m³ - një rritje prej afro 23 për qind nga viti 2024 dhe më shumë se 22 herë mbi udhëzimin e OBSH-së.

25 qytetet më të ndotura në botë ndodheshin të gjitha në Indi, Pakistan dhe Kinë, me Indinë që ka tre nga katër më të ndoturat.

El Paso në Teksas ishte qyteti i madh më i ndotur në SHBA ndërsa Los Angelesi në Kaliforni u rendit si rajoni më i ndotur. Seattle në Washington ishte qyteti i madh më i pastër amerikan.

- Liderët e cilësisë së ajrit

Nieuwoudtville në Afrikën e Jugut, ishte qyteti më i pastër në botë, me një mesatare vjetore të PM2.5 prej vetëm 1.0 µg/m³.

Trembëdhjetë vende dhe territore ruajtën nivele të PM2.5 nën standardin e OBSH-së prej 5 µg/m³ në vitin 2025, nga shtatë në vitin 2024. Këto përfshijnë Polinezinë Franceze, Porto Rikon, Ishujt e Virgjër Amerikanë, Barbadosin, Kaledoninë e Re, Islandën, Bermudën, Reunionin, Andorrën, Australinë, Grenadën, Panamanë dhe Estoninë.

Megjithatë, vetëm 14 për qind e qyteteve globale përmbushën standardin e cilësisë së ajrit të OBSH-së, nga 17 për qind një vit më parë. Rreth 91 për qind e vendeve dhe territoreve (130 nga 143) tejkaluan nivelin e sigurt.