OBSH dërgon ekip ekspertësh në Kinë për të hetuar shfaqjen e COVID-19

Organizata Botërore e Shëndetësisë (OBSH) do të dërgojë një delegacion në Kinë për të hetuar se ku u shfaq për herë të parë koronavirusi i ri (COVID-19) dhe si kaloi nga kafshët tek njerëzit, transmeton Anadolu Agency (AA).

Një anëtar i delegacionit që do të dërgohet në Kinë dhe një ekspert nga Instituti Gjerman Robert Koch, biologu Fabian Leendertz, tha për Associated Press se qëllimi i dërgimit të ekipit në Kinë ishte "mbledhja e të dhënave për t'u përgatitur më mirë për pandemitë e mundshme në të ardhmen".

Ai gjithashtu deklaroi se qëllimi sigurisht nuk është të fajësohet ky vend.

"Kjo është për të kuptuar se çfarë ka ndodhur dhe nëse është e mundur të zvogëlojmë rreziqet në të ardhmen bazuar në këto të dhëna", shpjegoi Leendertz.

Ai deklaroi se ende nuk dihet rruga e saktë që do të bëjnë gjatë vizitës, e cila duhet të organizohet muajin tjetër.

Leendertz tha se ata presin që vizita të fillojë në qytetin kinez Wuhan, ku u shfaq virusi fillimisht.

Sipas tij, delegacioni do të analizojë nëse ka ndonjë të dhënë për të siguruar prova nëse virusi ishte shfaqur më herët sesa ishte njoftuar zyrtarisht.

Qëllimi i vizitës, në përgjithësi, është të kuptojë se çfarë ndodhi në Wuhan, nga cila kafshë apo transmetues dhe kur kaloi tek njeriu.

Leendertz thotë se sa më i njohur të jetë shkaku i përhapjes së infeksionit, aq më mirë mund të përgatitet për rreziqe të mundshme në të ardhmen.

Pasi autoritetet kineze thanë më herët se burimi i virusit nuk ishte në Kinë, u vërejtën propaganda sistematike se virusi erdhi në Kinë nga jashtë.

Një nga epidemiologët më të rëndësishëm në Kinë, Zhong Nanshan, më 27 shkurt tha se fakti që virusi u shfaq fillimisht në Kinë nuk do të thotë që burimi i tij është në Kinë dhe se kërkohen studime.

Zhao Lijian, zëdhënësi i Ministrisë së Jashtme të Kinës, shkroi në Twitter më 12 mars se ekzistonte një mundësi që infeksioni të ishte sjellë në Kinë nga ushtria amerikane.

“Publikoni të dhënat. SHBA-të na detyrohen një shpjegim", shkroi ai në atë kohë.

Pasi infeksioni doli nga Wuhani dhe u përhap në gjithë botën, Pekini u bë objekt i kritikave dhe nuk mungonin teoritë e konspiracionit rreth burimit të sëmundjes.

Autoritetet kineze gjithashtu pretendojnë se ekziston një mundësi që virusi të jetë transmetuar në Kinë përmes pakove të paketuara të ushqimit të ngrirë, të ardhur nga jashtë, por OBSH-ja tha se ka pak mundësi për përhapjen e infeksionit përmes ushqimit dhe paketimit.

Akademia Kineze e Shkencave gjithashtu shkroi një artikull ku deklaronte se infeksioni nuk u përhap nga Kina, por nga India ndërsa shkrimi u publikua në një nga revistat shkencore më prestigjioze "Lancet".

Lloji i ri i koronavirusit u shfaq në Kinë në fund të vitit 2019 dhe u përhap në të gjithë botën. Deri më tani, më shumë se 74.5 milionë njerëz janë infektuar me koronavirus ndërsa më shumë se 1.65 milionë njerëz kanë humbur jetën si rezultat i infeksionit.