Italia propozon zgjerimin e ombrellës së sigurisë së NATO-s në Ukrainë pa anëtarësim

Italia ka propozuar që Ukrainës t'i ofrohet mbrojtje nën mbrojtjen kolektive të NATO-s pa anëtarësim të plotë, transmeton Anadolu.

Duke folur në një takim të liderëve të BE-së në Bruksel, kryeministrja e Italisë, Giorgia Meloni, theksoi nevojën për "zgjidhje më të qëndrueshme" sesa dërgimi i trupave paqeruajtëse evropiane në Ukrainë.

Meloni propozoi që zgjerimi i Nenit 5 të NATO-s, respektivisht klauzola e saj e mbrojtjes kolektive, do të ishte më efektive.

"Kjo nuk është njësoj si anëtarësimi në NATO, por do t'i siguronte Ukrainës të njëjtën ombrellë sigurie që kanë vendet e NATO-s. Do t’i siguronte garanci të qëndrueshme, afatgjate dhe reale të sigurisë, më shumë se disa nga propozimet që shoh tani", tha Meloni.

Propozimi vjen në mes të përpjekjeve të vazhdueshme të liderëve evropianë për të forcuar mbështetjen për Kievin, pasi administrata e presidentit të SHBA-së Donald Trump, bën thirrje për një fund të shpejtë të luftës në vazhdim.

Muajin e kaluar, sekretari i Mbrojtjes i SHBA-së, Pete Hegseth, përjashtoi anëtarësimin e Ukrainës në NATO, një qëndrim i përkrahur nga Trumpi, i cili e ka hedhur poshtë idenë si jo praktike.

Në fjalët e saj, Meloni shprehu skepticizëm në lidhje me masat alternative të sigurisë, si vendosja e forcave paqeruajtëse të OKB-së ose kontingjentet ushtarake shtesë.

"Misionet paqeruajtëse të OKB-së janë një çështje tjetër, sepse misione të tilla vendosen kur procesi i paqes tashmë ka filluar", tha ajo.

Derisa propozimi i kryeministres italiane shënon herën e parë që ajo ka miratuar në mënyrë eksplicite zgjerimin e sigurisë së NATO-s në Ukrainë, ajo pranoi se ideja përballet me sfida, veçanërisht nga SHBA.

"Nuk ka ende afate konkrete, por shoh interes të konsiderueshëm për këtë ide nga partnerët tanë", tha Meloni.

Megjithatë, e ardhmja e propozimit mbetet e pasigurt ndërsa diskutimet vazhdojnë.

Ukraina shpresoi për anëtarësim në NATO në Samitin e Washingtonit në korrik të vitit 2024, por u përball me rezistencë. Presidenti ukrainas, Volodymyr Zelenskyy, ka këmbëngulur se NATO duhet të mbajë një prani në Ukrainë nëse anëtarësimi mbetet jashtë tryezës, madje duke sugjeruar vendosjen e trupave të NATO-s në përputhje me fuqinë ushtarake të Rusisë në terren.

Neni 5 i NATO-s thotë se një sulm ndaj një anëtari konsiderohet një sulm ndaj të gjithëve, duke e bërë propozimin e Melonit një ndryshim të rëndësishëm në bisedën rreth të ardhmes së sigurisë së Ukrainës.