Foshnja e porsalindur vdes nga i ftohti në Rripin e Gazës

Një foshnjë e porsalindur vdiq nga i ftohti i fortë në Rripin e Gazës mes kushteve të këqija të motit në enklavën e shkatërruar nga lufta, tha sot Ministria e Shëndetësisë, transmeton Anadolu.

Në deklaratën e ministrisë thuhet se foshnja dyjavëshe, Muhammad Khalil Abu al-Khair vdiq dje për shkak të hipotermisë mes të ftohtit të acartë.

Al-Khair ishte shtruar në spital në njësinë e kujdesit intensiv që nga e diela, tha ministria.

Të paktën 14 persona humbën jetën në një stuhi dimërore në Gaza javën e kaluar. Mbi 53 mijë tenda zhvendosjeje u përmbytën pjesërisht ose plotësisht, u rrëmbyen nga përrenjtë ose u shqyen nga erërat e forta, dhe 13 ndërtesa u shembën në të gjithë Gazën.

Izraeli vazhdon të bllokojë hyrjen e materialeve të strehimit si tenda dhe shtëpi të lëvizshme, duke shkelur detyrimet e tij sipas një marrëveshjeje armëpushimi që hyri në fuqi më 10 tetor.

Izraeli ka vrarë rreth 70.700 palestinezë, kryesisht gra dhe fëmijë dhe ka plagosur mbi 171 mijë në Rripin e Gazës që nga tetori 2023 dhe e ka shndërruar enklavën në rrënoja.