BE thirrje për dialog Kosovës dhe Serbisë

Përfaqësuesi i Lartë i Bashkimit Evropian (BE) për Punë të Jashtme dhe Politikë të Sigurisë, Josep Borrell, bëri thirrje që Kosova dhe Serbia të fillojnë dialogun për të normalizuar marrëdhëniet, transmeton Anadolu Agency (AA).

Borrell, në deklaratën me shkrim ku uroi qeverinë e koalicionit që dje u votua në Kosovë, tha se dëshirojnë që të zhvillojnë bashkëpunimin mes BE-së dhe Kosovës, duke potencuar se BE do të vazhdojë të punojë me popullin dhe institucionet e Kosovës.

"Është e rëndësishme që të zhvillohen marrëdhëniet rajonale të bashkëpunimit dhe fqinjësisë së mirë. Në këtë drejtim, presim që sërish të fillohet procesi i dialogut Beograd-Prishtinë. Gjendja aktuale nuk mund të lejohet të vazhdojë. Bisedimet për të siguruar normalizim mes palëve duhet të fillojnë shpejt", tha ai.

Dje, pas katër muajve vonesë, me shumicë votash Kuvendi i Kosovës votoi për formimin e qeverisë së re të vendit, të kryesuar nga Albin Kurti i Vetëvendosjes (VV), i cili arriti marrëveshje për koalicion qeverisës me Lidhjen Demokratike të Kosovës (LDK).

Në zgjedhjet e parakohshme parlamentare të tetorit të kaluar në Kosovë, partia e Kurtit arriti të grumbulloi më shumë vota, e ndjekur me një rezultat të ngushtë nga LDK.