Atomium, simboli i Brukselit i ndërtuar për nevojat e EXPO në vitin 1958

Skulptura Atomium e ndërtuar për nevojat e Ekspozitës botërore (EXPO) në vitin 1958 në Bruksel është kthyer në një lloj simboli të kryeqytetit të Belgjikës, transmeton Anadolu.

Kjo strukturë prej çeliku dhe alumini 102 metra e lartë u bë sensacion në ekspozitën ku Bashkimi Sovjetik prezantoi satelitin e parë artificial në orbitë Sputnik.

Atomium përfaqëson nëntë atome të një kristali hekuri në një shkallë prej 1:150 miliardë. Atomium nuk është vetëm tërheqës nga jashtë, por pamja e brendshme dhe përmbajtja e tij janë interesante. Nga nëntë sferat e Atomiumit, tre janë teknike dhe janë të mbyllura për vizitorët.

Atomium përdoret gjithashtu si një hapësirë ​​ekspozite. Në sferën bazë mund të gjeni ekspozitë të përhershme kushtuar EXPO 1958 dhe ndërtimit të Atomiumit.

Një ashensor me shpejtësi të lartë e çon vizitorin me një shpejtësi prej 5 metrash në sekondë në atraksionin kryesor të Atomiumit: një restorant i rrumbullakët dhe komod në sferën më të lartë nga ku ofrohet një pamje e mrekullueshme e qytetit.

Kur Panairi Botëror mbylli dyert e tij në vitin 1958, nëntë sferat e argjendta të Atomiumit u bënë pikë referimi e qytetit të Brukselit.