“Biosfera e Rezervatit të Prespës”, marrëveshje mes Shqipërisë dhe Gjermanisë

TIRANË (AA) - Ministri i Mjedisit të Shqipërisë, Lefter Koka dhe ambasadori i Republikës Federale të Gjermanisë në Tiranë, Hellmut Hoffmann firmosën sot marrëveshjen qeveritare “Rezervati Ndërkufitar i Biosferës Prespë”. Në bazë të marrëveshjes Qeveria Gjemane do të financojë me një grant prej 3.5 milionë eurosh, fazën e dytë të projektit “Rezervati Ndërkufitar i Biosferës Prespë”me një kohëzgjatje nga viti 2016 deri në vitin 2020, raporton Anadolu Agency (AA).

Pas nënshkrimit të marrëveshjes, ministri Koka falenderoi Qeverinë Gjermane për kontributin e vazhdueshëm për mjedisin shqiptar dhe theksoi se faza e dytë e projektit do të realizojë një menaxhim më të mirë të pyjeve dhe përdorim më të mirë të burimeve natyrore.

“Objektivi kryesor i Ministrisë së Mjedisit për Prespa 2 është përfshirja e komunitetit të zonës dhe përdoruesëve tradicionalë në këtë zonë të mbrojtur. Investimet e deritanishme kanë ndihmuar ndjeshëm në zbutjen e varfërisë në zonë, në sensibilizimin e vetë banorëve për pasuritë natyrore dhe nga ana tjetër për të pasur një administratë sa më cilësore e cila vazhdon bashkëpunimin e ngushtë me agjencitë homologe në Maqedoni dhe në Greqi” - u shpreh Koka.

Ambasadori Hoffmann se Gjermania është e vendosur të vijojë më tej bashkëpunimin me Shqipërinë në fushën e mjedisit. “Gjermania përmes Bankës për Zhvillim KfW dhe në bashkëpunim me qeverinë shqiptare ka zhvilluar programin e Parkut Natyror të Prespës, i cili synon të krijojë barazpeshën mes mbrojtjes së biodiversitetit dhe zhvillimit ekonomik. Natyra nuk njeh kufij shtetesh”- u shpreh më tej ambasadori Hoffmann.

Projekti bazohet në konceptin e projektit të sapopërfunduar “Rezervati Ndërkufitar i Biosferës Prespë” dhe përqendrohet në investimet e mëtejshme në Parkun Kombëtar të Prespës (PNP) në përfitim të popullsisë lokale, të diversitetit biologjik dhe një mbështetje fillestare për zhvillimin e Rezervës së re të Biosferës të miratuar nga UNESCO.

Qëllimi i Projektit është që të reduktojë shfrytëzimin mbi burimet natyrore, si edhe uljen e varfërisë në pjesën e Shqipërisë, të Rezervës së Biosferës Prespë. Kjo do të kontribuojë, sipas Ministrisë së Mjedisit të Shqipërisë në ruajtjen e biodiversitetit dhe në përmirësimin e kushteve të jetesës të popullsisë në Parkun Natyror të Prespës dhe në pjesën shqiptare të Rezervës së Biosferës. Gjithashtu, sipas kësaj ministrie është parashikuar që Parku Kombëtar i Prespës (PNP) do të zhvillohet në një zonë të mbrojtur model për Shqipërinë duke u shndërruar edhe në një institucion trajnimi për zonat e tjera të mbrojtura dhe stafin e tyre.