Турција: Болката сè уште свежа и четири години по нападот на ПКК

ЕЛАЗИГ (АА) - Преживеаните во терористичкиот напад на ПКК во 2016 година во источна Турција сè уште ја чувствуваат болката во нивните срца години по смртоносниот напад чија цел беше полицијата, јавува Агенција Анадолија (АА).

На 18 август 2016 година, возило бомба удри во полициска станица во источната турска област Елазиг, при што загинаа тројца полицајци, додека повредени беа 217 лица.

Абдулбасит Оздемир, кој во нападот останал без едно око, рече дека болката е сè уште свежа и четири години по нападот.

„Се надевам, нашата држава наскоро ќе го искорени тероризмот. Би сакал да се заблагодарам на нашиот министер за внатрешни работи Сулејман Сојлу. Тој соопшти дека пред два месеца го неутрализирале лицето кое го организирало овој напад. На тероризмот ќе му дојде крајот“, рече тој.

„Нападот беше многу силен. Сè уште ја преживуваме таа болка. За среќа, нашата држава работи на лекување на овие рани“, рече Селами Гокалп, друг сведок на нападот.

ПКК, која се наоѓа на листата терористички организации на Турција, САД и ЕУ, е одговорна за смртта на речиси 40.000 луѓе, вклучувајќи деца и жени.

Од 2016 година, ЈПГ, сирискиот огранок на ПКК, продолжи да напаѓа цивили со автомобили-бомби во областите во северна Сирија, во близина на границата со Турција, кои во голема мера беа расчистени од терористичките организации преку безбедносните операции на Турција.