Турската опозиција ја осудува изјавата на Бајден за намерата на мешање во политичките процеси во Турција

АНКАРА

Истакнати претставници на турската опозиција остро ја осудија изјавата на поранешниот американски потпретседател и претседателски кандидат на претстоечките избори во САД, Џо Бајден, кој рече дека ќе се залага за промена на власта во Турција и дека би можел да ја поддржи опозицијата во намерата на изборите во 2023 година да го собори турскиот претседател Реџеп Таип Ердоган, јавува Агенција Анадолија (АА).

Гласноговорникот на водечката опозициска Народна републиканска партија (ЏХП) Фаик Озтрак изјави дека опозицијата во таа земја политиката ја води поради доброто на турскиот народ, а не заради интересите на некои странски политичари.

„Нашата демократија и борба за слобода немаат потреба од никакви империјалистички наклонетости. Независноста е нашиот карактер", порача Озтрак.

Челникот на опозициската Партија Саадет Темел Карамолаоглу ги критикуваше коментарите на Бајден и рече дека неговата партија нема да дозволи странски политички актери да ја креираат политиката на Турција.

„Ние имаме знаење и искуство да се носиме со нашите проблеми, колкави и да се. Мирот во светот не може да биде воспоставен додека САД не престане да се меша во националните полиики на другите земји. Американскиот претседателски кандидат треба да се бави со проблемите во својата држава", порача Карамолаоглу.

И претседателскиот кандидат на ЏХП, на претходните претседателски избори во Турција, Мухарем Инџе, исто така ја осуди изјавата на Бајден и порача дека турскиот народ ја бира својата власт, а дека тоа не го прават странските политичари.

Претседателот на Партијата на демократијата и прогресот Али Бабаџан изјави дека турската демократија е во рацете на народот на таа земја, а дека на политичките партии не им е потребна никаква надворешна поддршка за да постигне изборен успех.

И основачот на Партијата на иднината, Ахмет Давутоглу, поранешен премиер на Турција, исто така, порача дека само турскиот народ може да избира кој ќе ја води државата и дека неговата партија не гледа ништо посилно од изборната волја на народот.

Видеоснимката на контроверзната изјава на Бајден за намерата со поддршка на опозицијата да ги менува политичките трендови и власта во Турција снимена е во декември во текот на уредничкиот деск на „Њујорк тајмс" (New York Times), а нејзината објава предизвика бројни критики и осуди.