Ahmet Gençtürk
13 Октомври 2020•Ажурирај: 14 Октомври 2020
АНКАРА (АА) - Турскиот брод за истражувања на енергетските ресурси „Оруч Реис“ вчера ја напушти земјата по издадениот 10-дневен навигациски телекс или Навтекс, јавува Агенција Анадолија (АА).
Турскиот министер за енергетика и природни ресурси, Фатих Донмез, изјави дека одржувањето на бродот на пристаништето во Анталија е завршено и дека ќе спроведува истражувачки активности во Источниот Медитеран.
„Ќе продолжиме со активностите за истражување, сондажа и заштита на нашите права“, изјави Донмез, додавајќи дека Турција е посветена кон пронаоѓање природни ресурси во регионот, доколку ги има.
Турскиот директор за комуникации, Фахретин Алтун, на Твитер напиша дека Турција ќе продолжи со планираните активности во рамките на нејзината поморска надлежност, истакнувајќи ја својата посветеност на изнаоѓање дипломатски решенија за споровите во регионот.
„Нашата порака е јасна: Ние остануваме посветени на дипломатско решение и ги охрабруваме сите страни, вклучувајќи ја и Грција, да ги поддржат дипломатските иницијативи на Турција. Но, не може да има преговори ако кажете ’што е мое е мое, а што е твое за тоа се преговара‘“, напиша тој.
Навтекс е поморски комуникациски систем што им овозможува на бродовите да ги информираат другите пловила за нивното присуство во одредена област, како и за други информации.
Бродот „Оруч Реис“ ќе спроведе сеизмички истражувања во Источниот Медитеран заедно со уште два други брода, „Атаман“ и „Џенгиз Хан“.
Истражувачкиот брод може да спроведува секакви видови геолошки, геофизички, хидрографски и океанографски истражувања, особено на континенталниот гребен, и истражувања за присуство на природни ресурси.
Исто така е еден од најголемите истражувачки бродови во светот, правејќи дводимензионални сеизмички операции на длабочина до 15.000 метри (50.000 стапки) и вршејќи дводимензионални и тридимензионални сеизмички, гравитациони и магнетни геофизички истражувања.
Во август, Турција продолжи со истражувања на енергетските ресурси во Источниот Медитеран, откако Грција и Египет потпишаа спорен договор за одредување на поморската граница.
Прогласувајќи го грчко-египетскиот договор за неважечки, Турција наложи бродот „Оруч Реис“ да ги продолжи своите активности во рамките на турскиот континентален гребен.
Турција континуирано се спротивставува на напорите на Грција за прогласување ексклузивна економска зона врз база на малите острови во близина на турскиот брег.
Анкара, исто така, нагласи дека енергетските ресурси во близина на Кипар мора да бидат поделени праведно помеѓу Турската Република Северен Кипар (ТРСК) и администрацијата на кипарските Грци на Јужен Кипар.
