АНТАЛИЈА (АА) – Во ископувањата спроведени во античкиот град Сиедра, во подрачјето на Аланија, турската област Анталија, откриен е мозаик од околу 15 квадратни метри, за кој се проценува дека потекнува од 4–6 век од нашата ера и на кој се наоѓа натписот „нека пукнат завидливците“, јавува Анадолу.

Во античкиот град, чија историја датира од пред околу 3 илјади години, продолжуваат ископувањата во рамки на Проектот „Наследство за иднината“ на Министерството за култура и туризам, под раководство на доц. д-р Ертуг Ергурер, професор на Факултетот за туризам при Универзитетот „Алаадин Кејкубат“.

Раководителот на ископувањата, Ергурер, во изјава за Анадолу рече дека за време на ископувањата во една од најголемите куќи во градот дошле до значајно откритие.

Нагласувајќи дека во централниот влезен дел на објектот е откриен многу добро зачуван мозаик, Ергурер рече: „Сè уште сме во раните фази на работите на мозаикот, кој се состои од геометриски и различни цветни мотиви. Сметаме дека мозаикот датира меѓу 4 и 6 век“.

Тој истакна дека елементот што го прави мозаикот од околу 15 квадратни метри посебен е присуството на два натписи на него, додавајќи: „Во централниот дел на мозаикот се наоѓа израз што значи ‘користи го со задоволство’ или ‘користи го со среќа’. Додека во влезниот дел на просторијата, во рамките на кружна бордура, се наоѓа втор натпис. Овој натпис има повеќе фигуративно значење“.

„Првиот збор во натписот значи ‘завист’ или ‘завидливец’, додека вториот збор значи ‘да пукне’ или ‘да експлодира’. Значи станува збор за израз што одговара на ‘нека пукнат завидливците’, што го користиме и денес. За нас беше големо изненадување да наидеме на ваков израз на влезот на објект изграден пред околу 1.500 години“, изјави тој.

Ергурер рече дека проценуваат оти градбата е една од важните куќи во Сиедра и дека ископувањата и реставрацијата ќе продолжат во неколку нејзини делови. Тој додаде дека со реставраторските работи мозаикот и градбата се ставени под заштита и дека ќе продолжат и работите за расчистување.