Калин го осуди нападот во Дијарбакир: „Терористите покажаа безгранична подлост и за време на пандемијата“

АНКАРА

Портпаролот на Кабинетот на турскиот претседател, Ибрахим Калин, најостро го осуди терористичкиот напад извршен утринава во кој животот го загубија 5 цивили на југоисточниот дел на Турција, јавува Агенција Анадолија (АА).

„Терористичката организација уште еднаш го покажа своето подмолно лице и своето дивјаштво. Не познавајќи ги границите на подлост, терористите го извршија нападот во екот на пандемијата на Ковид-19“, порача Калин.

Калин на Твитер исто така упати порака на сочувство до семејствата на настраданите лица во нападот кој терористите на ПКК утринава го извршија на периферијата на Дијарбакир.

Од Кабинетот на гувернерот на Дијарбакир е соопштено дека терористите на ПКК го извршиле нападот со активирање на експлозивна направа во местото Гулеч во подрачјето Кулп. Експлозивната направа е активирана во 6:30 часот по локално време во моментот на поминување на возилото со цивили.

„Пет наши сограѓани ги положија своите животи како шехиди во терористичкиот напади во Кулп“, се наведува во соопштението.

Турските безбедносни сили започнаа активности за пронаоѓање на виновниците за нападот.

Во својата над 30-годишна терористичка кампања против Турција, ПКК, којашто се наоѓа на листата терористички организации на Турција, САД и Европската Унија, одговорна е за смртта на 40.000 луѓе, меѓу кои има и деца и жени. ЈПГ е сириски огранок на ПКК.