ДИЈАРБАКИР
- Бестами БОДРУК
Местото Чермик во турската област Дијарбакир, кое зазема важно место во термалниот туризам, благодарение на водопадот Близнак и патеките за пешачење, ќе стане новата рута на љубителите на природата.
Чермик, кој во своето подрачје има голем број историски и културни споменици, бањи стари стотици години и водни ресурси за кои се тврди дека се добри за многу болести, има цел да стане нова рута на љубителите на природата, сплаварењето, планинарењето и алпинизмот, благодарение на природните убавини како што се потокот Синек, истоимениот кањон и планината Гелинџик, предмет на легендите, која наликува на самовилните оџаци од бајките.
Скриеното богатство во овој регион, водопадот Близнак и патеките за пешачење по природа се дел од овие убавини.
Водопадот Близнак и патеката за пешачење, која ќе им биде домаќин на посетителите на туристичката рута именувана како „златен триаголник“ на Месопотамија, е извонредно место за оние кои бараат изолирана рута во ова време на пандемија.
Рамазан Полат, управителот на околија Чермик, зборувајќи за Агенција Анадолија (AA), истакна дека сакаат да ги промовираат убавините на регионот и на Дијарбакир.
Осврнувајќи се на важноста на водопадот Близнак и пешачката патека во рамките на туристичката рута наречена „златен триаголник“ на Месопотамија, Полат истакна: „Сакаме да го промовираме ова место. Сакаме луѓето да знаат за ова место, во време на пандемијата своето време да го поминат во покомфорно и поздраво опкружување. Имаме студија за Парк на природата. Одржуваме средби со обласниот Директорат за природа и национални паркови.“
Тој на посетителите на регионот им ветува уникатно патување во кое при прошетката од едниот водопад до другиот, ќе бидат следени со звукот на птиците и шумолењето на водата, додавајќи дека помеѓу двата водопада има пешачка патека од приближно еден километар.
Наведувајќи дека во подрачјето се наоѓа и воденица стара повеќе од 250 години, Полат рече: „Луѓето прво ќе ги видат водопадите, ќе ја чујат песната на птиците, шумолењето на водата и ќе бидат во контакт со природата. Има многу мали водопади по течението на потокот. Покрај тоа, има ендемски растенија и диви животни како што се планинските кози.“
Градоначалникот на Чермик, Шехмус Карамехметоглу, истакна дека водопадите им се допаѓаат на љубителите на природата и фотографијата.
Информирајќи дека тие ќе создадат пешачка патека помеѓу водопадите, Карамехметоглу продолжи со зборовите: „Кога тукашните можности ќе им бидат претставени на луѓето, ќе има одлична услуга. Како општина, ќе сториме сѐ што е потребно. Чермик го заслужува тоа.“
Регионалниот директор за млади и спорт, Селалетин Карајилан, посочувајќи дека регионот е многу погоден за спортови во природа, изјави дека покрај тоа планираат да организираат и велосипедски тури и прошетки во природа.
