Коман и Чуамени цел на расистички коментари по поразот на Франција во финалето на Светското првенство

АНКАРА (АА) - По поразот на Франција од Аргентина во финалето на Светското првенство на ФИФА „Катар 2022“ во неделата, француските репрезентативци Кингсли Коман и Орелиен Чуамени беа цел на расистички кометари, јавува Агенција Анадолија (АА).

Напаѓачот Коман и играчот од средниот ред Чуамени направија погрешни чекори во финалето, како што прават сите играчи, но за разлика од другите фудбалски ѕвезди, и двајцата играчи се најдоа на нишан на онлајн расистички коментари по натпреварот.

Германскиот „Баерн Минхен“, клубот на Коман, ги осуди расистичките коментари упатени кон нивниот играч.

„ФК Баерн најостро ги осудува расистичките коментари кон Кингсли Коман“, напиша германскиот клуб.

„Семејството ФК Баерн стои зад тебе, Крале. За расизмот нема место во спортот, ниту во нашето општество.“

Некои британски играчи, како Маркус Рашфорд, Џејдон Санчо и Букајо Сака, исто така беа изложени на расистички коментари откако промашија пенали минатата година во финалето на ЕУРО 2020, што резултираше со пораз на Англија од Италија.