Турското МНР го повика швајцарскиот амбасадор поради упадот на терористичката ПКК во седиштето на СЗО во Женева

АНКАРА (АА) - Привремениот вршител на должноста амбасадор во швајцарската Амбасада во Анкара беше повикан во турското Министерство за надворешни работи по насилното влегување на припадниците и поддржувачите на терористичката организација ПКК во седиштето на Светската здравствена организација (СЗО) во Женева, јавува Агенција Анадолија (АА).

„Толерантниот однос на швајцарските власти кон поддржувачите на ПКК им овозможи насилно да влезат во зградата на 9 ноември“, истакна портпаролот на Министерството, Танжу Билгич, во соопштение.

Тој истакна дека и покрај упорните напори на Туркије во Анкара и Швајцарија, поддржувачите на ПКК долго време одржуваат пропагандни настани и протести на местата каде што се лоцирани дипломатските мисии на ОН и на Туркије, прикажувајќи слики од нивниот терористички водач и организацијата, без да бидат преземени никакви мерки од швајцарските власти.

„Вистинските очекувања на нашата земја и нашите граѓани кои живеат во Швајцарија се швајцарските власти да ја спречат црната пропаганда на ПКК и сите видови активности и делување на ПКК во Швајцарија, каде што ерменската терористичка организација АСАЛА исто така го одзеде животот на вработен во нашиот Генерален конзулат во Женева“, се наведува во соопштението.

Се додава дека Туркије очекува Швајцарија, која е домаќин на меѓународни организации, да ги исполни своите обврски во рамките на меѓународното право, да ги запре пропагандните активности на смртоносната терористичка организација и да придонесе во меѓународната соработка за борба против тероризмот.