Sayed Khodaiberdi Sadat
29 Септември 2021•Ажурирај: 30 Септември 2021
КАБУЛ (АА) - Привремената Влада на талибанците во Авганистан објави дека ќе го користи Уставот од периодот на владеењето на последниот авганистански крал Мухамед Захир Шах како основа на политичкиот систем, јавува Агенција Анадолија (АА).
Вршителот на должноста министер за правда во привремената талибанска Влада, Мавлеви Абдул Хаким Шари, рече дека сите делови од Уставот на поранешниот крал Шах ќе бидат повторно имплементирани, освен оние што се спротивни на шеријатот и талибанските приоритети.
Нагласувајќи дека талибанците ги почитуваат и меѓународните закони кои не се спротивни на приоритетите на шеријатот и талибанците, Шари рече дека талибанците сакаат да воспостават добри односи со земјите низ светот.
„Нема да дозволиме територијата на Авганистан да се користи против која било друга држава“, рече Шари.
Последниот авганистански крал Мухамед Захир Шах беше на власт од 1933 до 1973 година, а Уставот од неговиот период на владеење содржеше 11 дела и 128 члена.
Талибанците, тој Устав, познат и како монархиски закон, го имплементираа во 2001 година кога првпат ја презедоа контролата врз Авганистан.
Главната карактеристика на Уставот е дека кралот има големи овластувања, и во моментов не е познато колку овластувања талибанскиот лидер Хибатула Ахунџада ќе резервира за себе.
