ОН: Израелската офанзива во Рафа ќе предизвика уште поголемо страдање на цивилите и смрт

ИСТАНБУЛ (АА) - Агенцијата на Обединетите нации за помош на палестинските бегалци (УНРВА) денес изрази голема загриженост за потенцијалните последици од израелската офанзива во Рафа, нагласувајќи дека офанзивата ќе резултира со зголемено страдање и цивилни жртви, јавува Анадолу.

„Израелската офанзива во Рафа би предизвикала повеќе цивилни страдања и смрт“, напиша УНРВА на платформата X.

„Последиците би биле погубни за 1,4 милиони луѓе“, се додава.

Во врска со ескалацијата на ситуацијата, УНРВА ја нагласи својата посветеност да го задржи присуството во Рафа колку што е можно подолго.

„УНРВА не се евакуира: Агенцијата ќе го задржи присуството во Рафа колку што е можно подолго и ќе продолжи да обезбедува помош за спас на луѓето“, се наведува во соопштението.

Израелската војска утрово издаде наредба за итна евакуација на палестинските жители и раселените лица од неколку делови во источна Рафа, повикувајќи ги веднаш да се релоцираат во градот Ал-Маваси.

Според армиското радио, одлуката за евакуација на жителите од источна Рафа е донесена доцна синоќа на седница на Владата. Се наведува дека во подрачјето се смета дека има околу 100.000 цивили кои треба да бидат евакуирани.

Во Рафа има 1,4 милиони раселени Палестинци кои се засолнети од војната што започна по нападот на Хамас на 7 октомври 2023 година, кој однесе околу 1.200 животи.

Речиси седум месеци по почетокот на израелската војна, огромни делови од Газа се во урнатини, 85 отсто од населението на енклавата е внатрешно раселено, и наметната е целосна блокада на храна, чиста вода и лекови, според Обединетите нации.

Израел е обвинет за геноцид пред Меѓународниот суд на правдата. Во привремената пресуда во јануари се наведува дека е „веројатно“ дека Израел врши геноцид во Газа и му е наредено на Тел Авив да ги запре таквите акти и да преземе мерки за да гарантира дека хуманитарната помош ќе стигне до цивилите во Појасот Газа.