Израелската Армија срамни 35 отсто од зградите во Шуџаја, Газа

ГАЗА (АА) – Општината на Градот Газа денес откри дека израелската Армија целосно уништила 35 отсто од зградите и станбените објекти во населбата Шуџаја, на истокот на градот Газа, пренесува Анадолу.

Општината истакна дека „израелската Армија намерно гаѓаше витални објекти и инфраструктура, со цел да ја направи Газа непогодна за живеење“, посочувајќи дека „само во населбата Шуџаја срамнила 35 отсто од зградите и станбените објекти.“

„Израелската Армија намерно гаѓаше кон резервоари за вода, дрвја, џамии, училишта и сите есенцијални објекти во градот“, се додава.

Синоќа, Службата за цивилна одбрана во Појасот Газа објави дека над 60 тела биле извлечени од населбата Шуџаја по повлекувањето на израелската Армија по двонеделната копнена операција.

Повлекувањето на израелската Армија од Шуџаја откри големо разорување, населбата е претворена во урнатини. Армијата сруши цели станбени блокови, ги уништи улиците со булдожери и нишанеше кон локалната инфраструктура.

Израел, прекршувајќи ја резолуцијата на Советот за безбедност на Обединетите нации со која се бара итен прекин на огнот, се соочи со меѓународна осуда поради неговата континуирана брутална офанзива врз Газа од нападот на Хамас на 7 октомври 2023 година.

Според локалните здравствени власти, оттогаш се убиени над 38.300 Палестинци, главно жени и деца, а речиси 88.300 се повредени.

По девет месеци од почетокот на израелската војна, огромни делови од Газа се во урнатини, а има блокада на храна, чиста вода и лекови.

Израел е обвинет за геноцид пред Меѓународниот суд на правдата, чија последна пресуда му наложи веднаш да ја прекине својата воена операција во јужниот град Рафа, каде над милион Палестинци побараа засолниште од војната пред да започне копнената офанзива врз градот на 6 мај.

И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.