Израелска армија: Гаѓани се позициите на Хезболах во Јужен Либан

АЛ-КУДС (АА) - Израелската армија денес соопшти дека во текот на ноќта извршила воздушни напади врз воените позиции што ѝ припаѓаат на либанската група Хезболах во Јужен Либан, јавува Анадолу.

Во соопштението се наведува дека станува збор за одговор на ракетните напади од страна на либанската територија.

Се додава дека еден од нападите бил насочен кон позицијата на Хезболах во близина на Рас ал-Накуре во Јужен Либан.

Армијата соопшти дека противтенковски проектили биле истрелани од Либан кон Северен Израел и дека војската возвраќала.

Претходно денес Хезболах соопшти дека двајца нејзини членови биле убиени во судири со израелската армија во Јужен Либан.

Тензиите се зголемија по должината на израелско-либанската граница поради размена на оган меѓу израелските сили и Хезболах.

Ескалацијата се случи за време на израелските воздушни напади врз Појасот Газа, започнати по нападите на палестинската група Хамас врз израелските погранични градови.

Хезболах водеше неколку војни со Израел, последната во 2006 година, кога либанската група гранатираше големи израелски градови, нанесувајќи значајна материјална штета. Повеќе од 1.000 Либанци се убиени во судирите, а поголем дел од Јужен Либан, кој е средиште на Хезболах, беше разорен во израелските напади.