Загина палестинско дете од истрели на израелските сили на Западниот Брег

НАБЛУС

Во рација на израелските сили во окупираниот град Наблус на Западниот Брег животот го загуби 15-годишно момче од Палестина, пренесува Агенција Анадолија (АА).

Според очевидци, израелските сили упаднале во бегалскиот камп „Балата“ во источниот дел на Наблус за да приведат некои Палестинци.

Откако Палестинците реагирале на рацијата, израелските сили интервенирале користејќи вистински куршуми и солзавец. Од друга страна, младите Палестинци одговориле со фрлање камења.

Во писмената изјава дадена од палестинското Министерство за здравство се наведува дека 15-годишниот Имад Хашас, кој бил ранет во главата како резултат на огнот што го отвориле израелските сили, починал во болницата каде што бил однесен.

Израелските сили, кои често вршат рации во куќите на окупираниот Западен Брег и Источен Ерусалим, приведуваат Палестинци под различни обвинувања.

​​​​​​​