Експлозии и пожар во складиште со муниција во Украина, евакуирани 10.000 лица

КИЕВ (АА) - Силна експлозија одекна во складиште со муниција во украинскиот град Ичниа, јавува Anadolu Agency (AA).

Генералштабот на украинската војска соопшти дека првата експлозија се случила во три и пол часот по полноќ, и дека следувале серија експлозии од кои избил пожар во комплексот оддалечен од Киев околу 170 километри.

Во соопштението се наведува дека пожарникарските екипи се на терен, а од околните населби се евакуирани над 10.000 граѓани.

Според првичните информации, во експлозиите и пожарот немало загинати лица.

Сè уште не е позната причината за експлозиите кои предизвикаа голема паника меѓу граѓаните на украинскиот град.

И премиерот на Украина, Владимир Гројсман најави дека ќе ја посети Ичниа.

Минатата година, илјадници тони оружје и муниција беа уништени во слични експлозии во складиштата во Харков и Виница.