Данскиот министер за надворешни работи го повика Израел да ја повлече одлуката за окупација на Газа

Данскиот министер за надворешни работи, Ларс Локе Расмусен, денес го повика Израел „веднаш да ја поништи“ својата одлука за окупација на Газа, предупредувајќи дека овој потег само ќе ги влоши страдањата на цивилите во блокираната енклава, пренесува Анадолу

Одлуката на израелската Влада да „ја интензивира воената операција во Газа е погрешна“, рече Расмусен, според соопштението на данското Министерство за надворешни работи, објави данскиот весник „Берлингске“.

„Тоа само ќе предизвика уште поголеми страдања за цивилното население. Затоа го повикуваме Израел веднаш да ја поништи својата одлука“, додаде тој.

Расмусен ја нагласи потребата од „прекин на огнот, брз и непречен пристап на хуманитарната помош, ослободување на израелските заложници и траен мир во форма на дводржавно решение“.

Тој истакна дека можните мерки за зголемување на притисокот врз Израел ќе бидат „главни на агендата“ на состанокот на министрите за надворешни работи на ЕУ во Копенхаген кон крајот на август.

Изјавата дојде по неколку часа откако израелскиот Кабинет за безбедност го одобри предлогот на премиерот Бенјамин Нетанјаху за окупирање на градот Газа.

Израел се соочува со растечки гнев во светот поради својата деструктивна војна врз Газа, каде што од октомври 2023 година се убиени над 61.200 луѓе. Воената кампања ја опустоши енклавата, која се соочува со глад.

Минатиот ноември, Меѓународниот кривичен суд издаде налози за апсење на Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата поради своите воени дејства во енклавата.