Во најновите израелски напади низ Појасот Газа убиени 23 Палестинци, десетици се повредени

ГАЗА / ИСТАНБУЛ (АА) - Најмалку 23 Палестинци се убиени, а десетици се повредени во израелските напади врз Појасот Газа ова утро, изјавија медицински извори за Анадолу.

Израелската артилерија ги гранатираше цивилите што чекаа помош во близина на областа Зиким, во северниот Појас Газа, убивајќи 9 Палестинци и повредувајќи десетици.

Четири лица, меѓу кои и една жена, се убиени во израелски напад со беспилотно летало врз шатор во кој биле засолнети раселените Палестинци во градот Газа.

Во израелските напади, исто така, се убиени и три лица во областа Деир ал-Балах, а други три се убиени во бегалскиот камп Нусејрат.

Одделно, израелските авиони нападнаа домови во бегалскиот камп Бурејџ. Во нападот се убиени две лица, а повеќемина се повредени.

Две лица се убиени во напад на израелската Армија врз шатор во западен Хан Јунис, во јужниот дел на Појасот Газа.

Израел уби повеќе од 59.000 Палестинци, повеќето од нив жени и деца, во Појасот Газа од октомври 2023 година.

Воената кампања ја опустоши енклавата, го урна здравствениот систем и доведе до сериозен недостиг на храна.

Минатиот ноември, Меѓународниот кривичен суд издаде налози за апсење на Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел е обвинет за геноцид во Меѓународниот суд на правдата за својата војна против енклавата.