Алжир: Шумските пожари однесоа 15 животи, температурата на воздухот до 50 степени

АЛЖИР (АА) – Најмалку 15 лица загинаа, а 26 се повредени во шумските пожари што зафатија неколку региони во Алжир, каде што температурите на воздухот во последните денови се искачија на 50 Целзиусови степени, јавува Анадолу.

Пожари избувнаа на шумски и земјоделски површини на 97 различни точки во 16 алжирски града, а некои од пожарите зафатија и села, се наведува во соопштението на алжирското Министерство за внатрешни работи.

Во пожарите во Алжир досега загинаа 15 лица, 26 се повредени, а околу 500 луѓе се евакуирани.

Шумските пожари сè уште беснеат во крајбрежните градови, како Бумердас, Буира, Тизи Визу, Бејаја, Џиџел и Скикда, а напорите за гаснење продолжуваат со мобилизирање на сите ресурси.

Националната цивилна заштита вчера соопшти дека поради високите температури на воздухот избувнале шумски пожари во седум града на северот на земјата, а гаснењето од воздух и од земја продолжува.

Метеоролошкиот завод на Алжир го вклучи алармот од портокалово на црвено и соопшти дека во земјата преовладуваат тешки климатски услови и температурата на воздухот надминува 48 степени.

Околу еден месец во Алжир се забележуваат рекордни температури што во главниот град достигнаа 48 степени, а во другите региони до 50 степени.