Muhammed Semiz
04 Октомври 2021•Ажурирај: 05 Октомври 2021
РАМАЛА
Махмуд Абас, претседателот на Палестина, вчера во Рамала се состана со израелска делегација, јавуваат локалните медиуми, пренесува Агенција Анадолија (АА).
Делегацијата составена од членови на левичарската партија Мерец ја предводеа израелскиот министер за здравство Ницан Хоровиц и израелскиот министер за регионална соработка Исави Фреј, објави официјалната палестинска новинска агенција ВАФА.
За време на состанокот, Абас изјавил дека Израел треба да стави крај на својата окупација и активностите на изградба на еврејските населби, истакнувајќи дека со спроведувањето на меѓународните резолуции би требало да се постигне праведен и сеопфатен мир.
Тој нагласи дека Израел треба да престане да ги руши домовите на Палестинците и да ги депортира од Ерусалим (Ал-Кудс).
Од друга страна, делегацијата на партијата Мерец, која е дел од коалициската влада предводена од израелскиот премиер Нафтали Бенет, ги потврди своите ставови во корист на решение за две држави, ставање крај на окупацијата и заедничката соработка за градење мостови на доверба, нагласувајќи ја важноста на соработката во областа на здравството.
Партијата Мерец е една од неколкуте израелски политички партии кои поддржуваат формирање на палестинска држава со Источен Ерусалим (Ал Кудс) како главен град и се противат на изградба на еврејски населби.
Абас на 29 август во Рамала одржа состанок со израелскиот министер за одбрана Бени Ганц, а тие двајца според наводите разговарале за сите аспекти на односи меѓу Палестина и Израел.
Израелскиот претседател Исак Херцог на 12 јули му соопшти на претседателот Абас дека има намера повторно да го покрене дијалогот меѓу двете страни.
