ИСТАНБУЛ (АА) – Португалија денес се соочува со првиот генерален штрајк по 12 години откако синдикатите мобилизираа работници и ги запреа клучните јавни услуги, меѓу кои образованието, здравството и транспортот, јавува Анадолу.

Штрајкот, инициран од синдикатите ЦГТП и УГТ, има цел да го блокира пакетот за реформи на трудот предложен од Владата на премиерот Луис Монтенегро, објави португалскиот дневен весник „Публико“.

Болници, училишта, фабрики, водовод и комунални служби, како и земјоделските и рибините пазари, се затворени низ земјата – од север до југ.

Португалските железници сообраќаат со минимални линии, а лисабонското метро ги затвори сите станици поради штрајкот.

Генералниот секретар на ЦГТП, во изјавата за новинарите, ги повика работниците масовно да се вклучат во штрајкот, со цел да се подобрат условите за живот и да се прати јасен сигнал за одбивање на предложениот трудов пакет, објави јавниот сервис РТП.

Во меѓувреме, генералниот секретар на УГТ за Радио Ренасенса изјави дека учеството во генералниот штрајк може да надмине 80% и нагласи дека не се исклучува организирање втор генерален штрајк доколку пропаднат преговорите.

Нацрт-реформата на Владата беше остро критикувана бидејќи, според синдикатите, предвидува олеснување на отпуштањата, слабеење на колективното договарање и зголемување на работната несигурност.