İlayda Çakırtekin
07 Ноември 2025•Ажурирај: 07 Ноември 2025
ИСТАНБУЛ (АА) – Данска би можела да се соочува со силни бури и покачувања на морското ниво на секои три години доколку светот не ги исполни климатските цели, јави денес данската национална телевизија ДР, повикувајќи се на податоци од Данскиот метеоролошки институт (ДМИ), пренесува Анадолу.
Таквите бури, кои се опишуваат како „настани што се случуваат еднаш на 100 години“, како онаа што ја погоди Данска во октомври 2023 година, би можеле да станат честа појава на секои три години во следните 50 години доколку светот продолжи по сегашната траекторија на глобално затоплување со пораст на температурата од 2,8°C.
Доколку се исполни целта на Парискиот договор за ограничување на зголемувањето на температурата на 1,5°C, силните бури би се случувале на секои шест години, покажуваат анализите на ДМИ.
„Дури и со Парискиот договор ќе има појава на зголемени бури и поплави, но тоа е нешто со што може да се справиме преку различни мерки“, изјави за ДР професорот Јенс Хеселбјерг Кристенсен, експерт за мраз, клима и геофизика при Институтот „Нилс Бор“.
Податоците на ДМИ, исто така, покажуваат дека Данска ќе доживува повеќе топлотни бранови доколку светот продолжи по тековниот климатски курс, со просечно пет дена топлотни бранови годишно до крајот на овој век.
Истовремено, бројот на денови со мраз значително ќе се намали. Ако порастот на температурата изнесува 1,5°C, годишно ќе има помалку 13 дена со мраз; при 2,5°C, тој број ќе се зголеми на 21 ден, а при 4°C дури 34 дена помалку со мраз.
„Во дрвјата постојат бактерии што може да им наштетат, но тие се уништуваат од студот. Кога веќе ќе немаме мраз, дрвјата ќе бидат изложени на сосема нов вид предизвик“, објасни Кристенсен.
Во својот 16. Извештај за емисиите, Програмата на ОН за животна средина (УНЕП) предупреди дека дури и ако сите тековни национални климатски планови целосно се спроведат, глобалните температури би можеле да пораснат меѓу 2,3°C и 2,5°C до крајот на векот.
