Граничниот премин Рафа го преминуваат 165 камиони на турската Црвена полумесечина со хуманитарна помош за Газа

АНКАРА (АА) - Сто шеесет и пет камиони на турската Црвена полумесечина со приближно 3.000 тони храна, кои се пратени до жителите на Газа што се борат со глад, го преминале граничниот премин Рафа и почнале да влегуваат во регионот, известува Анадолу.

Турската Црвена полумесечина, која работи на ублажување на хуманитарните страдања во Газа и покрај сите тешкотии, објави дека започнало преминувањето на камионите откако израелските сили привремено дозволиле да помине хуманитарната помош.

Помошта, која се состои од приближно 3.000 тони храна, е еквивалентна на храна за 50.000 луѓе за еден месец. Работејќи во соработка со египетската Црвена полумесечина, тимовите на турската Црвена полумесечина продолжуваат да работат за да се осигурат дека помошта ќе стигне до луѓето во Газа колку што е можно побрзо.

Турската Црвена полумесечина, која обезбедува дневни топли оброци преку народните кујни во Газа од првиот ден на конфликтот, работи и во координација со јорданската Црвена полумесечина за да се обезбеди проток на помош во регионот преку Јордан.

- „Хуманитарните работници не треба да се цел“

Претседателката на турската Црвена полумесечина, Фатма Мерич Јилмаз, чии коментари беа вклучени во соопштението, го осуди вчерашниот напад на израелските сили врз седиштето на палестинската Црвена полумесечина во Кан Јунис, во Јужна Газа.

Нагласувајќи ја потребата од траен прекин на огнот во Газа, Јилмаз рече:

„Извор на длабока тага за нас е што цел на напади се работниците на палестинската Црвена полумесечина, кои дистрибуираат помош во Газа и по цена на сопствените животи и покрај огромните напори што се вложуваат за испорака на помош. За жал, еден хуманитарен работник го загуби животот, а двајца се сериозно повредени. Најостро го осудуваме овој напад врз нашата сестринска организација, палестинската Црвена полумесечина. Од 6 октомври досега бројот на хуманитарни работници што ги загубија своите животи во Газа достигна 480. Хуманитарните работници не треба да се цел. Овие напади се јасно кршење не само на меѓународното право туку и на човештвото. Како турска Црвена полумесечина го повторуваме нашиот повик: во Газа мора да се воспостави траен прекин на огнот, а цивилите и хуманитарните работници мора да бидат заштитени.“