Токио воведе систем за забрзан одговор при катастрофи управуван од вештачка интелигенција

ИСТАНБУЛ (АА) - Властите во Токио воведоа систем управуван од вештачка интелигенција дизајниран да го подобри времето за одговор на катастрофи, како што се пожари и уривања на згради, пренесува Анадолу.

Системот, развиен од Хитачи Лтд., користи камери на поголема височина за „автоматски да ги идентификува пожарите и колапсот на зградите“ во реално време, објави денес токиската Кјодо њуз.

Откако ќе детектира, системот веднаш ги пренесува критичните информации до полицијата, противпожарната служба и јапонските сили за самоодбрана, олеснувајќи го брзиот одговор.

Оваа иницијатива доаѓа во период кога Јапонија и понатаму е во состојба на зголемена готовност поради предупредувањата за потенцијален „мега“ земјотрес.

Инсталирани се камери со висока резолуција во владините згради во метрополитенското подрачје на Токио и на разни други локации низ градот за поддршка на системот.